Italia matiza que os controis serán para viaxeiros non europeos chegados desde España

O Goberno de Italia matizou este venres que os controis aeroportuarios e portuarios a viaxeiros chegados de España e decretados pola crise en Ceuta serán aleatorios e só afectarán cidadáns que non pertenzan á Unión Europea (UE).

"O restablecemento dos controis de acceso nas fronteiras aéreas e marítimas con España non suporán ningún cambio para os viaxeiros españois e europeos cara a Italia, que seguirán podendo entrar no noso país, como de costume, sen ningún trámite burocrático adicional", informan fontes gobernamentais.

Pouco antes, o Ministerio do Interior informara da súa decisión de introducir controis en portos e aeroportos con España pola crise en Ceuta tras a chegada de miles de persoas desde Marrocos.

O ministro do Interior, Matteo Piantedosi, tomou esta decisión tras unha reunión do Comité de Análise sobre a Inmigración e a Seguridade das fronteiras.

O Executivo italiano non precisou canto tempo durarán estes controis

Polo momento non se especificou canto tempo durará esta reintroducción de controis. Doutra banda, o ministro italiano mantivo unha conversación telefónica co seu homólogo francés, Laurent Nuñez, para acordar o reforzamento dos controis nas fronteiras terrestres entre ambos os países.

Francia multiplica por cinco os axentes na fronteira con España 

Francia vai a quintuplicar desde este sábado o número de axentes encargados dos controis fronteirizos con España, con 334 policías e xendarmes que se sumarán aos efectivos habitualmente mobilizados en reacción á crise migratoria de Ceuta, anunciou o ministro do Interior, Laurent Núñez.

Nunha mensaxe na súa conta de X, Núñez xustificou ese dispositivo e precisou que este venres xa se triplicaron os reforzos, xunto aos medios despregados habitualmente, con 184 policías e unha vixilancia reforzada con drons.

"Fronte á situación en Ceuta, conforme a demanda do presidente da República (Emmanuel Macron), empezou o despregamento dos reforzos na fronteira española".

O sábado, aos axentes adicionais virán sumar medios de vixilancia aérea, con tres avións. En paralelo, van incrementar as patrullas nos trens que circulan polo eixo ferroviario entre Francia e España.

Macron, se por unha banda mostrou a súa solidariedade con España e ofreceu "calquera axuda necesaria", alén de propoñer a intervención da axencia europea Frontex, que as autoridades españolas non quixeron ata o de agora, por outra ordenou máis controis na fronteira con España para impedir que as persoas que entraron pola fronteira de Ceuta poidan chegar ao seu país de forma clandestina.

Albares critica a "confusión interesada" sobre a seguridade do espazo Schengen

 O ministro de Asuntos Exteriores, criticou este venres a "confusión interesada" arredor da seguridade do espazo Schengen, que varios países europeos puxeron en dúbida ao vinculala coas entradas irregulares de miles de inmigrantes a Ceuta, e destacou que a súa integridade está "absolutamente garantida".

"Non é posible trasladarse de Ceuta e Melilla á Península sen identificarse nun control de policía", asegura o ministro, para remarcar que "a integridade do espazo Schengen está absolutamente garantida", dixo Albares na súa conta da rede X.

"Basta de confusión interesada", resolveu na súa mensaxe Albares, que aclara que "a práctica totalidade" dos inmigrantes que entraron en Ceuta volveu xa a Marrocos.

A Comisión Europea considerou este venres que non se pode especular cos motivos da chegada de migrantes a Ceuta e lembrou que esa cidade autónoma e Melilla non están suxeitas á normativa Schengen, despois de que, alén de Italia, países como Finlandia ou Dinamarca expuxesen romper a colaboración con España nese espazo de libre circulación.