Irán estuda a proposta de paz estadounidense mentres Trump ameaza con máis ataques
Os Estados Unidos esperan "respostas iranianas sobre varios puntos clave nas próximas 48 horas"
Trump afirmou que "se Irán accede a cumprir co acordado, o cal é, talvez, unha gran suposición, a xa lendaria operación Furia Épica chegará á súa fin"
Imaxe das rúas de Teherán, este mércores (Majid Asgaripour/WANA (West Asia News Agency) vía REUTERS)
Irán afirmou este mércores que segue avaliando a proposta dos Estados Unidos para selar un acordo de paz, despois de que o presidente estadounidense, Donald Trump, advertise de que, se Teherán non acepta o seu plan, atacaría ao país con maior intensidade que antes.
"A proposta dos Estados Unidos está a ser avaliada por Irán e, unha vez que conclúa a súa revisión, Irán trasladará os seus puntos de vista á parte paquistaní", declarou o portavoz do Ministerio iraniano de Exteriores, Ismail Bagaei, á axencia ISNA.
Ao mesmo tempo, Trump afirmou na súa rede Truth Social que "se Irán accede a cumprir co acordado, o cal é, talvez, unha gran suposición, a xa lendaria operación Furia Épica chegará ao seu fin e o bloqueo, sumamente eficaz, permitirá que o estreito de Ormuz estea aberto para todos, incluído Irán".
Estas afirmacións chegaron despois de que o portal estadounidense Axios, citando a funcionarios estadounidenses e outras dúas fontes informadas anónimas, informase de que Teherán e Washington están preto de alcanzar un acordo que poña fin ao conflito e abra a vía cara a un espazo de negociacións sobre a cuestión nuclear iraniana.
De acordo co portal, os Estados Unidos esperan "respostas iranianas sobre varios puntos clave nas próximas 48 horas".
"Aínda non se chegou a un acordo, pero as fontes indicaron que esta era a maior proximidade que as partes tiveran a un pacto desde o inicio da guerra", sinalou o medio.
Segundo o acordo, Irán comprometeríase a unha moratoria no enriquecemento nuclear; Estados Unidos levantaría as súas sancións e liberaría miles de millóns de dólares en fondos iranianos conxelados, e ambas as partes eliminarían as restricións ao tránsito polo estreito de Ormuz.
Trump informou onte da suspensión da operación Proxecto Liberdade, que lanzaran os EUA o luns para liberar aos buques atrapados no estratéxico estreito de Ormuz por mor do bloqueo iraniano.
O mandatario estadounidense dixo que a decisión se debe ao “considerable progreso cara a un acordo” con Teherán, sen dar máis detalles ao respecto.
