Investigan dous coruñeses por vender potenciadores sexuais non autorizados

Dous veciños da Coruña están investigados pola comercialización de medicamentos non autorizados como potenciadores sexuais, no marco da Operación Lidoca.

O operativo levouno a cabo o Equipo de Investigación da Unidade de Protección da Natureza (UPRONA) da Comandancia da Garda Civil da Coruña, no marco da Operación Pangea XVI, impulsada pola Xefatura do Servizo de Protección da Natureza en coordinación con Interpol, contra a comercialización ilegal de medicamentos e dispositivos a través de Internet.

A investigación, que se iniciou en outubro de 2023, centrouse na vixilancia de produtos publicitados como potenciadores sexuais, que, baixo a aparencia de ser naturais, poderían conter ingredientes prexudiciais para a saúde pública.

O 9 de novembro de 2023 localizouse na canle de vendas dunha rede social un produto chamado Rhino Africano, presentado como un retardador da exaculación precoz, importado de Colombia.

A investigación permitiu a identificación das persoas responsables da publicidade e da importación destes produtos a España desde Colombia, ambos residentes na Coruña.

Á vista de que o produto carecía dos datos relativos a etiquetaxe esixidos para a súa venda en España e ante a sospeita de que puidera tratarse dun medicamento comercializado de maneira clandestina, procedeuse á incautación dos produtos, que foron remitidos á Axencia Española de Medicamentos e Produtos Sanitarios (AEMPS) para unha análise exhaustiva.

O informe resultante da axencia revelou a presenza de lidocaína, un anestésico local, no produto, que o clasifica como medicamento non autorizado en España.

Ante o potencial perigo para a saúde pública que representaba a comercialización sen autorización destes medicamentos, entre o 23 e o 28 de febreiro de 2024, procedeuse á investigación destas persoas, que foron postas ao dispor do Xulgado de Instrución de Garda da Coruña.