Investigan un condutor que ía a 219 km/h no acceso da AP-9 a Ferrol
O home non puido ser interceptado polos axentes no momento de ser detectado polo radar, e tras localizalo comprobaron non contaba con carné de conducir, xa que anteriormente lle fora retirado o permiso "de xeito definitivo"
A Garda Civil investiga un condutor por circular a 219 quilómetros por hora nun tramo limitado a 100 e correspondente á AP-9F, o acceso da Autoestrada do Atlántico a Ferrol, amais de por carecer de permiso de condución en vigor.
O Instituto Armado informa este martes de que o implicado é un home de 45 anos, ao que se lle atribúen dous delitos contra a seguridade viaria por "conducir un vehículo de motor a unha velocidade delituosa e por facelo carecendo da correspondente autorización debido á perda da súa vixencia".
Os feitos investigados ocorreron contra as 21:30 do 31 de maio e nun punto de verificación de velocidade do corpo de seguridade, establecido cun radar móbil instalado por axentes da súa sede en Ferrol.
Así, os gardas detectaron que un coche circulaba a 219 km/h á altura do quilómetro 33,300, entre os municipios de Narón e Neda, "superando a velocidade permitida nese tramo específico, fixada en 100 km/h".
"A velocidade rexistrada pasa amplamente o limiar penal tipificado para as vías interurbanas, onde constitúe delito superar en máis de 80 quilómetros por hora o límite establecido", especificou a Benemérita, que na nota precisa que os seus integrantes non puideron "interceptar o vehículo de forma inmediata no momento do control".
Por iso, o seu Equipo de Investigación de Sinistros iniciou unha investigación, pola que localizou o coche e identificou o seu condutor, proceso en que tamén se constatou que o home carecía de carné de conducir válido por "perder a vixencia do mesmo de xeito definitivo", feitos polos que se remitiron dilixencias a un xulgado de Ferrol.
