Interceptan por quinta vez un condutor sen carné no Porriño
O home, de 28 anos e veciño de Tui, deu positivo en alcol e circulaba sen seguro nin ITV
A Garda Civil investígao por un delito contra a seguridade viaria
A Garda Civil de Pontevedra interceptou por quinta vez un home de 28 anos, veciño de Tui, que conducía un coche sen ter obtido nunca o permiso de condución. O detido conta con antecedentes por feitos similares.
Segundo informou o corpo, os axentes de Tráfico déronlle o alto na autovía A-55, no termo municipal do Porriño.
Durante a intervención realizáronlle as probas de alcol, que deron resultado positivo, e comprobaron ademais que o vehículo en que circulaba carecía de seguro e de ITV en vigor.
A actuación enmárcase no plan específico de vixilancia e control de condutores multirreincidentes do Subsector de Tráfico de Pontevedra.
Tras inmobilizar o vehículo, os axentes citaron o implicado para comparecer no Xulgado do Porriño como investigado por un delito contra a seguridade viaria, ao conducir sen ter o carné.
Os feitos serán agora avaliados pola autoridade xudicial, que podería decretar o ingreso en prisión do condutor.
