Inhabilitada seis anos unha médica por acceder á historia clínica dunha compañeira

A sección segunda da Audiencia Provincial da Coruña inhabilita durante seis anos unha médica por acceder sen autorización á historia clínica dunha compañeira, coa que mantiña unha mala relación, utilizando a súa tarxeta profesional e claves de acceso.

Segundo a sentenza do 18 de febreiro que publicou este venres o Tribunal Superior de Xustiza de Galicia, o tribunal imponlle unha multa de 5.400 euros e o pago dunha indemnización á vítima de 6.000 euros polos danos causados.

Os maxistrados tamén a condenan a tres anos e medio de cárcere, aínda que explican na resolución que en trámite de execución propoñerase o indulto parcial da pena de prisión.

A sala conclúe na sentenza que a acusada, especialista no Complexo Hospitalario Universitario da Coruña, actuou con plena conciencia da súa conduta delituosa, accedendo a datos sensibles sen motivo asistencial e sen o consentimento da afectada.

Por iso, considéraa autora dun delito de descubrimento de segredos de saúde cometido por funcionaria pública. A sentenza non é firme, pois é recorrible ante o TSXG