Imputan a Jácome por prevaricación por non pedir a compatibilidade para dirixir Auria TV

O alcalde de Ourense, Gonzalo Pérez Jácome, foi imputado por un delito continuado de prevaricación ao non pedir a compatibilidade para desempeñar as súas funcións de rexedor á vez que as de propietario da súa televisión, Auria TV, e manter así o seu soldo en calidade de dedicación exclusiva.

Segundo expuxo no auto o xuíz da Praza número 1 da Sección de Instrución do Tribunal de Instancia de Ourense, Leonardo Álvarez, resulta "evidente" a obrigación do rexedor de solicitar a compatibilidade entre o seu cargo de alcalde con dedicación exclusiva e o desenvolvemento da actividade a cargo dunha televisión pública de carácter local, "sen que se admitan interpretacións".

"Gonzalo Pérez Jácome tiña que expor ante o pleno do Concello de Ourense a cuestión debatida para que o pleno valorase se se lle recoñece ou non se lle recoñece a compatibilidade entre o seu cargo desempeñado en forma de dedicación exclusiva e a explotación dunha televisión pública e local", apuntou o maxistrado.

Neste sentido, o titular da sección de Instrución número 1 lembrou que o alcalde cobrou -desde 2020 e ata novembro de 2025 cando se recibiu a certificación xudicial- máis de 400.000 euros pola súa condición de alcalde, recibindo concretamente 69.925,94 en 2020, 70.555,24 euros en 2021, 73.024,70 euros en 2022, 75.215,42 euros en 2023, 77.457,30 euros en 2024 e 66.699,96 euros en 2025.

O xulgado anula o cesamento da tesoureira municipal e Jácome anuncia recurso

O tribunal de Instancia de Ourense anulou o cesamento da tesoureira municipal no Concello da cidade e ordenou a súa reincorporación inmediata deixando sen efecto o decreto da Alcaldía, segundo deu de coñecer o consistorio, e o alcalde, Gonzalo Pérez Jácome, xa avanzou que recorrerá o fallo.

A resolución estima os recursos interpostos pola funcionaria e polo Colexio de Secretarios, Interventores e Tesoureiros de administración Local e anula e deixa sen efecto o decreto da Alcaldía polo que se procedía ao seu cesamento no posto.

O cesamento da funcionaria, que se fixo efectivo no ano 2024, produciuse despois de que o rexedor considerase que era demasiado “tiquismiquis”, ante as críticas de todos os grupos da oposición.

Segundo indican desde o consistorio, o fallo recoñece o dereito da traballadora para percibir todos os efectos económicos e administrativos derivados desta decisión.

En todo caso, o Concello que preside Gonzalo Pérez Jácome avanzou a súa intención de recorrer esta resolución ante a Sala do contencioso-administrativo do Tribunal Superior de Xustiza de Galicia.

A través das súas redes sociais, Pérez Jácome confirmou a presentación dun recurso de apelación para "reverter" a resolución que considera "intromisión inaceptable nas facultades organizativas da administración local".

Nesta liña, subliñou que a "perda de confianza" nos postos de libre designación responde a "un concepto subxectivo que corresponde unicamente ao Alcalde" e por tanto, considera que o xuíz "debe limitarse a verificar que esa explicación existe, pero non pode xulgar se a razón é boa ou mala, porque iso sería invadir a competencia política do cargo electo".

"É un golpe que creemos debe reverterse, porque defenderemos que un xuíz non pode impoñer a un alcalde quen debe ser o seu tesoureiro cando a lei outorga esa facultade de elección e cesamento por confianza", recolle o alcalde, quen advirte de que o labor da xustiza é controlar a legalidade formal, "non substituír a vontade das urnas por un criterio privado do xulgador".

Jácome esgrime que o cesamento dun cargo de libre designación é un acto de "discrecionalidad técnica e política" e o fondo desa decisión é, por tanto, "inatacable" e deixa claro que o goberno non vai dar "nin un paso atrás na defensa da nosa autonomía".

Conclúe que un tribunal non pode entrar en valoracións subxectivas sobre a idoneidade ou a confianza privado.