Hostalería e xeriátricos libéranse de restricións
Hostalería e xeriátricos libéranse de restricións
A fin da emerxencia sanitaria permitiu aliviar as medidas
Os datos epidemiolóxicos determinarán cada quince días as restricións
A desactivación do estado de emerxencia en Galicia permitiu desde esta fin de semana que a hostalería e o ocio nocturno quedaran libres de restricións horarias, recuperaran o cento por cento de ocupación e o uso das barras, que bastantes clientes botaban de menos.
"Houbo que adaptarse, non quedou máis remedio. Pero a verdade é que estaba moi incómodo e deixei de ir a moitos sitios porque non podía estar na barra", explícanos un deles.
"A barra é un complemento. A moita xente antes de ir comer gústalle tomar algo na barra, non vai directo á mesa", dinos o xerente dunha casa de comidas.
Nos xeriátricos, os maiores poden entrar e saír libremente, pero quen os vaia visitar deberá solicitar cita previa.
O que máis nos afasta dos tempos previos á pandemia son as máscaras, aínda obrigatorias se non está garantido o metro e medio de distancia con outras persoas.
Un dos divulgadores sanitarios máis seguidos, o galego Héctor Castiñeira, coñecido polo seu psedónimo literario Enfermera Saturada, confía en que as poidamos deixar proximamente.
"Segundo a incidencia que vexamos, haberá que abrir ou pechar máis a man. Pero eu son optimista e penso que nas próximas semanas, nos próximos meses, irémonos esquecendo xa das máscaras e doutras medidas, progresivamente", vaticina.
Desde a Consellería lembran que a evolución dos datos epidemiolóxicos determinará cada quince días que restricións caen ou se hai que volver instaurar algunha.