Morren dúas persoas con covid nunha xornada con máis de 14.500 casos activos
A cifra de falecidos na pandemia elévase en Galicia a 2.720 persoas
Detectáronse 1.242 positivos en 24 horas, (+2)
Lixeira baixada na presión asistencial con nove pacientes menos en planta pero dous máis nas UCI
A entrada con forza da variante ómicron semella que non vai dar respiro no que se refire ao empeoramento das cifras de infeccións e de contaxios con vistas ao Nadal, aínda que sexa menor o impacto nas hospitalizacións, grazas ás vacinas, respecto de vagas anteriores da covid.
O predominio da delta sitúa os indicadores así: Galicia entra en risco moi alto da enfermidade e supera a incidencia de 500, con 14.797 casos activos, (+451) con datos das 18 horas do venres.
O dato máis positivo das últimas horas é o de hospitalizacións, con 221 enfermos ingresados en planta, nove menos que a xornada anterior. Nas UCI empeora algo a situación, con 49 pacientes, dous máis.
Os positivos diagnosticados mantéñense estables respecto do xoves, aínda que seguen en cifras récord da sexta vaga, con 1.242 contaxios diarios, (+2). Os positivos deste sábado son un 13 % máis que o milleiro diagnosticado o anterior.
O Sergas notifica este sábado dous falecementos de persoas que foran diagnosticadas con covid. Son unha muller de 70 anos hospitalizada en Pontevedra e un home de 72 ingresado no complexo hospitalario de Vigo. Con elas, a cifra total de decesos aumenta a 2.720 desde o comezo da pandemia en Galicia.
Situación por áreas sanitarias
Os indicadores da incidencia da covid seguen a mostrar datos preocupantes en todas as xerencias hospitalarias, pero nas últimas horas a de Ourense mostra unha lixeira melloría, cunha baixada de casos activos, de hospitalizacións tanto en planta coma nas UCI e cunha redución dos positivos diarios detectados nas probas diagnósticas realizadas na provincia. Mentres o sur de Galicia estabiliza os datos da incidencia da covid o norte empeora, sobre todo A Coruña e Santiago.
A de Vigo segue a ser a que rexistra os peores datos e os contaxios aproxímanse aos 400 diarios. Tamén ten a peor situación nas UCI, cunha vintena de enfermos ingresados, (21). Santiago pola contra só ten un paciente en agudos.
A Coruña: 2.216
Vigo: 4.743
Ourense: 2.712
Pontevedra: 2.250
Santiago: 1.372
Lugo: 949
Ferrol: 555
