Quiroga e Calvos de Randín, declaradas zonas gravamente afectadas polos incendios

O Goberno aprobou este martes no Consello de Ministros a declaración de zona afectada gravemente por unha emerxencia de protección civil dos municipios que sufriron os "episodios adversos" ocorridos entre os pasados 13 e 20 de setembro, como a dina Adam.

Nunha conferencia de prensa, a ministra de Inclusión, Seguridade Social e Migracións e portavoz do Goberno, Elma Saiz, precisou hoxe que eses incidentes afectaron a 45 territorios de 9 comunidades autónomas e provocaron, nalgúns puntos, "inundacións e danos materiais cuantiosos, de xeito especialmente grave a dina Adam", que deixou sete vítimas mortais.

Entres as zonas afectadas gravemente están os concellos galegos de Calvos de Randín e Quiroga polos incendios que afectaron estes dous municipios no pasado mes de setembro. 

Despois de catro días loitando contra as lapas, os servizos de extinción conseguiron sufocar o incendio forestal de Calvos de Randín. O lume quedou extinguido o domingo 27 de setembro pola noite tras queimar unha superficie de 518 hectáreas, segundo a Xunta de Galicia. O incendio no concello lugués de Quiroga calcinou 467 hectáreas, 320 de arboredo e 147 de monte raso.

"Esta declaración permitirá activar liñas de axuda para compensar os danos sufridos por persoas, institucións, en aplicación do principio de solidariedade entre territorios e para complementar a actuación das administracións autonómicas e locais", afirmou.