Galicia e Cataluña lideran a investigación do primeiro fármaco contra a covid
O que sería o primeiro antiviral español está en fase de ensaio clínico
Investigadores galegos e cataláns traballan no primeiro antiviral español contra a covid. O fármaco, aínda en fase de ensaio clínico, estase a probar en 120 pacientes de Atención Primaria de Galicia e Cataluña.
Froito da colaboración público-privada de investigadores galegos e cataláns nace este ensaio clínico do que podería saír o primeiro fármaco español contra a covid. Para acurtar o camiño, o que fan é reposicionar unha molécula xa existente e comprobar se logra rebaixar a carga viral.
"Foi unha alegría saber que o mellor candidato era un dos descubertos na unidade mixta da Universidade de Santiago de Compostela, Esteve, para a dor neuropática e que superara a fase 1 de seguridade en humanos", di Mabel Loza, investigadora do IDIS.
Xa demostraron que a molécula é segura e ben tolerada por vía oral, agora están a comprobar a súa eficacia con 120 pacientes de urxencias e de Atención Primaria das 2 comunidades.
"Pretendemos que este ensaio clínico poida demostrar a eficacia e seguridade para pacientes ao inicio da covid. Sería o primeiro fármaco desenvolvido en España para o tratamento da covid", asegura Rafael Maldonado, investigador da Universidade Pompeu Fabra.
"Uns investigadores galegos e unha entidade que, neste caso, permite que se poida facer un ensaio clínico no ámbito da covid e que se poida facer en Galicia e con investigadores galegos é, sen dúbida, un feito moi importante", afirma Julio García Comesaña, conselleiro de Sanidade.
O resultado saberase en dúas semanas. Polo momento só o Paxlovid está aprobado e dispoñible para tratar a COVID nos hospitais, pero non pode usarse en todos os pacientes. Por iso cómpre buscar alternativas coas que atallar a pandemia.
