Galicia, Asturias e Murcia piden diálogo ao Goberno sobre o financiamento autonómico

Galicia, Asturias e Murcia reiteraron este martes que non están de acordo co novo modelo de financiamento autonómico que propón o Goberno central e pedíronlle diálogo para buscar un sistema que sexa adecuado para todas as comunidades autónomas.

Os conselleiros de Facenda destas tres autonomías, Miguel Corgos (Galicia), Guillermo Peláez (Asturias) e Luis Marín (Murcia) lanzaron esta mensaxe en declaracións a medios de comunicación na marxe dunhas xornadas organizadas en Santiago de Compostela pola Rede de Investigadores en Financiamento autonómico e Descentralización financeira en España (RIFDE).

Corgos lembrou que o sistema de financiamento autonómico é "da máxima importancia" porque achega "practicamente o 80 %" dos recursos dos que dispoñen as comunidades para elaborar as súas contas e prestar os servizos públicos.

Con todo, a proposta do Ministerio de Facenda "recibiu numerosas críticas" de todas as comunidades autónomas excepto unha, a catalá, sinalou o conselleiro.

"No caso de Galicia, vemos con preocupación esta proposta porque afecta de forma grave aos factores de custo que son clave para poder prestar os servizos públicos fundamentais en termos de igualdade en todas as comunidades autónomas. En particular, este sistema lamina o peso do envellecemento e da dispersión e, polo tanto, prexudica moito non só Galicia, senón todas as comunidades do noroeste de España", defendeu.

Pediu ao Ministerio que "reflexione" e "expoña unha nova proposta de modelo, falando con todas as comunidades autónomas a priori e non simplemente tomando como seu un modelo que lle propón un socio de Goberno con intereses particulares".

Tamén incidiu no custo dos servizos públicos o conselleiro asturiano, que lembrou que teñen unha posición pactada con outras sete autonomías, incluída Galicia, para defender un modelo onde o prioritario sexa o custo efectivo dos servizos públicos e non a capacidade tributaria dos territorios.

Peláez reiterou que a proposta do Goberno, tal e como está exposta, non lles vale: "Votaremos 'non' se non se fai ningún cambio a esa proposta".

Pero tendeu a man a un "diálogo construtivo" para negociar un novo modelo que teña en conta o envellecemento, a dispersión demográfica e unha serie de variables que inciden no custo efectivo dos servizos públicos.

O conselleiro de Facenda de Murcia lamentou ter "a deshonrosa honra de ser a comunidade peor financiada de toda España de xeito recorrente" e pediu un novo modelo que reverta esa situación e permita que os cidadáns murcianos "polo menos" pasen a estar financiados como o resto de españois.

"Pola nosa banda non vai quedar por tender a man ao Ministerio. Entendemos que é unha tarefa ímproba. É unha tarefa moi complexa reformar o sistema de financiamento, pero creo que partindo do que nos une e non do que nos separa, poderémolo conseguir en todas as comunidades autónomas", dixo Marín.

No programa das xornadas estaba previsto inicialmente que participasen os titulares de Facenda da Comunidade Valenciana, José Antonio Rovira, e Estremadura, Elena Manzano Silva, pero por cuestións de axenda non acudiron.

As xornadas celébranse este martes e mércores na Facultade de Ciencias Económicas e Empresariais da Universidade de Santiago de Compostela e a reitora, Rosa Crujeiras, participou na apertura, onde pediu que se inclúa á universidade pública no debate do financiamento autonómico.

"Somos un investimento estratéxico que sostén ao futuro do país", sinalou, e pediu un financiamento "estable" para as universidades.