Galicia acada 108 bandeiras azuis, situándose como terceira comunidade con máis distintivos

Galicia consegue 108 bandeiras azuis, 6 menos ca o ano anterior, e colócase terceira entre as comunidades autónomas con máis insignias segundo o último listado da Asociación de Educación Ambiental e do Consumidor (Adeac), promotora desta iniciativa medioambiental, que recoñece areais en todo o mundo en base a criterios de sustentabilidade, accesibilidade e servizos.

España contará nas súas costas este verán con 749 estandartes: 642 en praias (4 máis que en 2024), 101 en portos deportivos e 6 para embarcacións turísticas sostibles. Adeac recoñece deste xeito a España como líder mundial de bandeiras azuis en praias.

O 15 % das praias do planeta con estandarte ambiental sitúase en España, o que evidencia "a excelencia das súas auga, a súa accesibilidade e seguridade", segundo o informe, que recolle datos de máis de 5.000 puntos en 52 países dos cinco continentes.

Galicia terá seis bandeiras menos que o ano anterior, pero, con 108 distintivos, é a terceira comunidade con máis insignias. Lidera ademais a lista de municipios con máis recoñecementos coas localidades de Sanxenxo e Vigo. Sanxenxo terá 20 distintivos, 17 para praias e 3 para porto deportivo; mentres, Vigo terá 13 bandeiras, 12 de praias e 1 de porto deportivo. Porén queda fóra da lista a praia de Samil.

En total serán 12 portos deportivos os recoñecidos en Galicia, un máis que o ano anterior coa incorporación do Liceo Marítimo de Bouzas.

Tamén recibe o recoñecemento por vez primeira a praia do Mende en Vigo. Ademais, recuperan a bandeira os areais Grande, en Miño, e San Francisco, en Muros.

Estas son as praias galegas que acadan a bandeira azul este ano 2025:

A Coruña

· A Coruña: As Lapas, Orzán-Matadero, Oza, Riazor, San Amaro

· A Laracha: Caión

· A Pobra do Caramiñal: Lombiña-Cabío

· Arteixo: A Salsa (Repibelo), Barrañán, Combouzas, Porto de Suevos, Sabón, Valcobo

· As Pontes de García Rodríguez: Lago das Pontes

· Bergondo: Gandarío

· Camariñas: Arou

· Carballo: Pedra do Sal, Razo, Saíñas

· Dumbría: Ézaro

· Ferrol: A Fragata-O Pareixal, Caranza, Doniños, Esmelle, San Xurxo

· Laxe: Laxe

· Malpica de Bergantiños: Area Maior

· Miño: A Ribeira, Grande, Perbes-Andahío

· Muros: San Francisco

· Oleiros: Bastiagueiro, Espiñeiro, Mera, Naval, Santa Cristina

· Ponteceso: A Ermida, Balarés, O Osmo

Lugo

· Barreiros: Coto, Fontela Valea

· Burela: A Marosa, O Portelo

· Cervo: O Torno

· Foz: A Rapadoira, Areoura, As Polas, Llas, Peizás

· O Vicedo: Abrela, Xilloi

· Ribadeo: As Catedrais, Os Castros-Illas

· Viveiro: Area

· Xove: Esteiro

Pontevedra

· A Guarda:  Area Grande, O Muíño

· Illa de Arousa: Area da Secada, Bao (Camaxe)

· Baiona: Barbeira, Concheira, Frades, Ladeira, Ribeira, Santa Marta

· Bueu: Area de Bon, Lagos, Lapamán, Portomaior

· Marín: Aguete, Mogor, Portocelo, Santo de Mar – A Coviña

· Moaña: O Con

· Poio: Cabeceira, Xiorto

· Ponte Caldelas: Praia fluvial A Calzada

· Sanxenxo: A Lapa, Agra, Areas, Areas Gordas, Baltar, Bascuas, Canelas, Caneliñas, Foxos, Major, Montalvo, Nosa Señora da Lanzada, O Espiñeiro-A Lanzada, Panadeira, Paxariñas, Pragueira, Silgar

·  Vigo: A Argazada, A Fontaiña, A Punta, Rodas (Illas Cíes), Canido, Carril, O Adro, O Fortiñón, O Mende, O Vao, Santa Baia, Tombo do Gato

· Vilagarcía de Arousa: Campanario, Compostela