Francia reforza a fronteira sur e Italia propón suspender o acordo de Schengen con España por Ceuta

O ministro francés de Interior, Laurent Nuñez, afirmou este venres que se reforzarán os controis na fronteira con España e que está en contacto co Goberno español pola crise da chegada masiva de migrantes desde Marrocos á cidade norteafricana española de Ceuta.

"Ante a situación observada no enclave de Ceuta, desde onte pola noite dei instrucións para reforzar sen demora os controis na fronteira española. Ademais, activei a Forza Fronteiriza de Intervención Rápida para levar a cabo controis exhaustivos", indicou Nuñez na súa conta de X.

Algo máis cedo, nunha entrevista na cadea de radio RTL, o ministro recalcou que se puxo xa o xoves en contacto co seu homólogo do Goberno español e que ten previsto volver falar con el este venres sobre a evolución das chegadas masivas de migrantes a Ceuta para intentar cruzar ilegalmente a España.

Consultado pola reacción do Executivo italiano, que pediu este xoves o peche do espazo Schengen con España, Nuñez mostrouse moderado e lembrou que os controis fronteirizos existen e que mesmo foron reforzados nos últimos meses, cunha forza móbil que se mantivo de xeito permanente.

"Por suposto, tomaranse medidas se se producen desprazamentos cara ao territorio nacional e, en calquera caso, reforzarase o control fronteirizo", aseverou.

Italia considera suspender o acordo de Schengen con España pola situación en Ceuta

O Goberno italiano está a considerar a suspensión da aplicación do Tratado de Schengen de libre circulación con España tras o ocorrido en Ceuta, segundo informaron este xoves fontes do Executivo.

A postura favorable a esta medida foi apoiada polo ministro de Asuntos Exteriores, Antonio Tajani, quen expresou o seu firme apoio ao traballo que vén realizando o titular do Interior, Matteo Piantedosi.

"Estou a favor de pechar o espazo Schengen con España e teño plena confianza no traballo do ministro Piantedosi. A inmigración irregular e descontrolada supón un perigo para a seguridade nacional", manifestou Tajani a través dunha publicación en X.

O xefe da diplomacia italiana vinculou directamente esta posible decisión ás medidas adoptadas recentemente polo Executivo español en materia de regularización, un proceso que equiparou erroneamente á concesión da cidadanía española.

"As imaxes procedentes de Ceuta mostran como a decisión do Goberno de Madrid de conceder a cidadanía española, e por tanto europea, a máis de 500.000 inmigrantes ilegais é profundamente errónea e fomenta a trata de persoas", engadiu Tajani, a pesar de que a regularización actualmente en marcha en España non establece a concesión da cidadanía.

A eventual suspensión das garantías de libre circulación do Tratado de Schengen -un mecanismo previsto con carácter excepcional pola normativa comunitaria para salvagardar a seguridade interior- supoñería o restablecemento temporal dos controis fronteirizos entre Italia e España.

Ata o momento, o Ministerio de Exteriores non precisou cando se formalizará a petición ante as autoridades da Unión Europea nin os prazos nos que se aplicarían as posibles restricións.

Tamén Finlandia, a través da súa ministra de Interior, Mari Rantanen, apoiou este venres excluír a España do espazo Schengen.

Albares convoca o embaixador italiano polas declaracións do seu homólogo sobre Ceuta

O ministro de Asuntos Exteriores de España, José Manuel Albares, convocou o embaixador de Italia en Madrid, Giuseppe Buccino Grimalii, tras unhas declaracións do seu homólogo italiano, Antonio Tajani, en que se mostrou favorable a pechar o espazo Schengen con España ante a situación en Ceuta.

"Esta mensaxe é impropia do ministro de Exteriores dun país socio e amigo do que esperamos solidariedade europea e non demagoxia partidista", sinalou Albares nunha mensaxe na rede social X en que se fai eco desas palabras de Tajani.

Unhas palabras en que relaciona os feitos de Ceuta co proceso de regularización de inmigrantes que hai en curso en España.

Albares subliñou que os feitos de Ceuta teñen relación cunha sentenza do Tribunal Supremo (en alusión á que determina que non se pode devolver en quente a quen entre a nado en Ceuta e Melilla) e non ten nada que ver co proceso de regularización.

Por todo iso, anunciou que convoca o embaixador italiano para expresarlle o seu rexeitamento a esas declaracións de Tajani.

Fontes do Goberno insistiron niso e aseguraron que é falso que algunha persoa que cruzase nestes días a Ceuta poida acollerse a este proceso xa que este esixe uns requisitos moi definidos, como acreditar a residencia en España antes do 1 de xaneiro de 2026 e permanecer en España cinco meses continuados no momento de presentar a solicitude.

Esta crise reiteraron que ten a súa orixe nunha interpretación da decisión do Tribunal Supremo, que foi instrumentalizada polas mafias e as organizacións criminais para aproveitarse da situación de extrema vulnerabilidade das persoas migrantes.

Da mesma forma, subliñan que esta crise migratoria non é a primeira nin será a última en Europa, e que o Goberno avoga por unha xestión eficiente destes procesos, con respecto á legalidade española, europea, internacional e aos dereitos humanos.

O Goberno afirma que agradece a solidariedade europea e rexeita o uso demagóxico e partidista de situacións como a que se está vivindo en Ceuta. 

Os Países Baixos instan a España a "facer o necesario" para protexer fronteira de UE en Ceuta

O ministro neerlandés de Exteriores, Tom Berendsen, asegurou este venres que "confía" en que España fará "o necesario" para protexer a fronteira exterior da Unión Europea (UE) en Ceuta, á vez que instou tamén a Marrocos a adoptar "as medidas oportunas" ante a situación, que cualificou de "preocupante".

O xefe da diplomacia neerlandesa explicou que este venres falou cos seus homólogos español e marroquí para abordar a situación, aínda que non deu máis detalles sobre o contido desas conversacións, e celebrou que a Comisión Europea ofrecese apoio a España.