Ford prescindirá de 1.100 traballadores en España
O ERE afectará o persoal da planta de Almussafes, en Valencia
En abril a planta deixará de producir os S-Max e Galaxy e quedará só coa fabricación do Kuga á espera da fabricación dos novos vehículos eléctricos
A dirección de Ford España informou este venres os sindicatos de que o expediente de regulación de emprego (ERE) que aplicará na fábrica de Almussafes (Valencia) afectará uns 1.100 empregados aproximadamente.
Así llo trasladou á comisión negociadora coa que a empresa iniciou o período de consultas para aplicar o ERE o pasado día 3 de marzo.
En abril deste ano está previsto o cesamento da fabricación dos modelos S-Max e Galaxy porque a multinacional está a acelerar a súa estratexia de cara á electrificación total dos seus vehículos de pasaxeiros en 2030.
Á espera da fabricación dos novos vehículos eléctricos, a factoría de Almussafes quedará só coa produción do Kuga, o de maior peso actualmente.
Na planta de Ford en Almussafes traballan 5.800 operarios.
