Filipe VI sobre a ONU: "Oito décadas de multilateralismo e cooperación, dificilmente poden considerarse un fracaso"

O rei Filipe VI puxo destacou os valores que inspiraron o multilateralismo na primeira metade do  século XX como a "maior fortaleza" en tempos de incerteza e de "retos", e sinalou que a UE "ten a responsabilidade de facerse escoitar" para reafirmar eses "valores éticos".

Así o trasladou o monarca durante a súa intervención, que comezou en galego, na inauguración do Foro La Toja Vínculo Atlántico 2025, que este ano centra os seus relatorios na nova orde mundial, e onde Filipe VI constatou que esa orde "está a cambiar". 

Respecto diso, advertiu de que a linguaxe da concertación "é substituída pola da coerción e a violencia", e puxo como exemplos os conflitos en Ucraína, Gaza, O Sudán ou no Sahel, á vez que chamou a "reforzar" o multilateralismo.

Nese sentido, lembrou que a ONU naceu con esa vontade, aínda que hoxe está sometida "a unha intensa campaña de descrédito" e "presenta signos de fatiga institucional" que limitan a súa capacidade de resposta.

"Algúns poderían pensar que defender os valores que inspiraron o multilateralismo é unha debilidade en tempos incertos. En realidade son nosa maior fortaleza. Nin a radicalidade nin a división achegan solucións, como tampouco o fai un liderado que queda na retórica", proclamou o rei.

Pediu tamén que a desafección, a perda de cohesión ou os ataques externos non fagan "retroceder no camiño percorrido" nas últimas décadas. Por iso, para "reafirmar" os valores éticos, trasladou que "a UE ten a responsabilidade de facerse escoitar". "Debe proxectar unha voz firme en defensa deses valores e asumir un papel protagonista na configuración da nova orde internacional", remarcou.

O rei tamén fixo referencia ao nacemento da UE e á integración de España na "nova Europa", un paso que deu lugar a unha gran transformación nun país cuxa democracia se asentou na Constitución do 78.

Precisamente defendeu Filipe VI o espírito de concordia da Transición como una "guía moi valiosa" ante o desafío de construír unha nova orde mundial nestes tempos con "claros e escuros",  en que a linguaxe da concertación é reemprazada pola da coerción e violencia.

Neste contexto, o rei referiuse aos 'pais' da Carta Magna, dous dos cales, Miquel Roca e Miguel Herrero y Rodríguez de Miñón, recolleron este xoves o Premio Foro La Toja-Josep Piqué. 

Alfonso Rueda presume de Galicia como  unha illa onde "nada se confronta máis alá do necesario"

O presidente da Xunta, Alfonso Rueda, presumiu de Galicia  na apertura do Foro La Toja como "unha illa de estabilidade" onde "todo se discute, pero nada se confronta máis aló do estritamente necesario".

O dirixente autonómico destacou o "interese" que suscita o encontro que se celebra ata o sábado na Toxa, onde afirmou que Galicia ten a súa "propia esencia", unha identidade que "está aí sempre", pero tamén é unha terra "acolledora", que ten "vínculos con Europa, potentes e duradeiros", como o Camiño de Santiago, e con América.

No seu discurso, advertiu da "pelexa entre os que se esforzan por estreitar vínculos e os que se esforzan por rompelos" e avogou pola "diplomacia" en lugar do uso da forza, que debe ser "o último recurso".

Rueda defendeu "a política real, a que arranxou problemas ao longo da historia", en contraposición con "as solucións fáciles" que "non funcionaron nunca e que vai seguir sen funcionar".

"Non hai solucións fáciles para resolver problemas complexos", sostivo o presidente autonómico, que fuxiu das formulacións "demagóxicas, curtopracistas" que son "patadas cara adiante". Para el, trátase de "tender pontes e non levantar muros", porque o líder "vai ser sempre o que constrúa, nunca o que rompa".

Rueda afirmou que os galegos "orgullosamente" forman parte de España e que Galicia é unha "illa de estabilidade, unha pequena excepción onde todo se discute, pero nada se confronta mais alá do estritamente necesario".

O líder do Executivo galego referiuse ao "conflito tremendo" en Gaza, que agora ten "unha solución enriba da mesa" e dixo que esa proposta abre unha "vía á esperanza" porque "a outra alternativa é demoledora.

Premiados dous 'pais' da Constitución

Dous dos sete 'pais' da Constitucion recibiron o Premio Foro La Toja-Josep Piqué. Tras recoller o galardón, Miquel Roca asegurou que a Constitución "estraña o diálogo e o consenso que a fixo posible", unha Carta Magna que non envelleceu, na súa opinión, pois os problemas que hai na actualidade non teñen orixe e causa no ordenamento constitucional, indicou.

Pola sua banda, Rodríguez de Miñón dixo en ton de broma ao subir os chanzos para o seu discurso: "Eu son coxo, pero a Constitución non coxea".

O premio que leva o nome do que fora ministro Josep Piqué e impulsor do foro (falecido hai dous anos) e co que se quixo render homenaxe aos sete políticos encargados das negociacións da Constitución.