Ferido leve un paciente do Hospital Arquitecto Marcide de Ferrol tras caer parte do falso teito do seu cuarto
Ferido leve un paciente do Hospital Arquitecto Marcide de Ferrol tras caer parte do falso teito do seu cuarto
O doente tivo que recibir puntos de sutura na cabeza e no nariz
Sanidade deu orde de revisar os cuartos contiguos e en altura coincidentes e corredores, e recolocou 28 pacientes noutros cuartos
Un paciente do Hospital Arquitecto Marcide de Ferrol quedou ferido leve este domingo tras desprenderse parte do falso teito do seu cuarto. En concreto, tivo que recibir puntos de sutura no coiro cabeludo e no nariz.
Segundo destacou a Consellería de Sanidade, "desde o momento que se coñeceu o sucedido déronse instrucións inmediatas para que técnicos revisasen os cuartos contiguos e en altura coincidentes, corredores e demais espazos co fin de garantir a seguridade de pacientes e do persoal".
Tal e como detallou o departamento autonómico, os técnicos realizaron unha primeira inspección, e está previsto que este luns "expertos en estruturas" analicen en detalle a situación para dispoñer "dunha avaliación máis pormenorizada sobre as medidas que sexa necesario adoptar".
En concreto, o desprendemento rexistrouse nun falso teito nun cuarto situado na quinta planta do edificio antigo do hospital. Segundo a Xunta, "para minimizar os riscos", recolocáronse 28 pacientes noutros cuartos.
As primeiras hipóteses apuntan aos efectos "dun posible choque de calor nas estruturas dos falsos teitos". Con todo, a Consellería insistiu en que "será a inspección técnica a que permita esclarecer as causas do ocorrido e adoptar de inmediato as medidas necesarias para paliar a situación".
"A Consellería de Sanidade lamenta o sucedido e pide desculpas polas consecuencias ocasionadas por este incidente, no que un paciente se viu involucrado e foi atendido de forma inmediata. Así mesmo, agradecemos o extraordinario esforzo dos profesionais que colaboraron nas medidas adoptadas para garantir a seguridade", concluíu.
