Ferida leve unha traballadora dun restaurante en Cabana de Bergantiños ao intentar apagar un incendio no almacén

Recuperar a normalidade. Isto é o que agardan o propietario e empregados dun restaurante na parroquia de Nantón, en Cabana de Bergantiños, despois de que o almacén, anexo ao local, ardera por mor dun curtocircuíto. O establecemento deberá estar pechado uns días. Tan só unha empregada tivo que ser atendida polo servizo médico dunha pequena queimadura e por inhalación de fume.

"Por sorte foi nun momento no que non había ninguén"

"Imos asimilando e agora os profesionais deben avaliar todo e día a día imos vendo os estragos que ocasionou" lamenta Félix Castiñeira propietario do restaurante situado no lugar da Pedra.

Intentando sobreporse ao susto que esta fin de semana levaron Félix e os oito empregados deste restaurante en Nantón, Cabana de Bergantiños. Un domingo como calquera outro en que estaban a preparar todo para o servizo de comidas no que ían atender medio cento de persoas.

"Tiñamos moitas reservas no comedor e por sorte foi nun momento no que non había ninguén no restaurante e non houbo consecuencias maiores", explica o propietario.

Si tivo que ser atendida unha empregada polos servizos médicos por unha pequena queimadura e por inhalación de fume. Tanto Félix como ela, alertados polo fume que entraba ao local, intentaron apagar as lapas pero sen éxito. Aos poucos minutos si o fixeron efectivos dos bombeiros de Carballo e do GES de Ponteceso.  

"Primeiro é a seguridade dos traballadores e dos clientes"

Hoxe o local segue pechado pero no almacén, onde se orixinaron as lapas, é un ir e vir constante de familiares e empregados intentando axudar nas tarefas de limpeza e poder volver á normalidade canto antes. O lume afectou toda a mercadoría e as perdas son cuantiosas, pois tamén quedou inservible o almacenado na cámara frigorífica e o conxelador. Isto fai que teña que pechar uns días.

"Primeiro é a seguridade", explica Félix Castiñeira, "temos que ter a certeza de que cando teñamos luz non haxa consecuencias porque primeiro é a seguridade dos traballadores e dos clientes", engade. 

Agardan que para esta fin de semana poidan recuperar a actividade normal e esquecer o que afortunadamente ao final quedou nun susto.