Montero di que en setembro presentarán o teito de gasto e que xa buscan apoios aos orzamentos
Moncloa cree que o único balance de Feijóo é o lodo e os pactos coa ultradereita e anuncia que en setembro presentarán o teito de gasto
O próximo mes de setembro, tras a paréntese de agosto, o Goberno activará a maquinaria de elaboración dos orzamentos para 2026. O primeiro paso será presentar unha nova senda de déficit e o coñecido coma teito de gasto.
A ministra de Facenda María Jesús Montero está convencida de poder lograr o máis difícil: convencer grupos coma Podemos ou Junts de que lles apoien as contas. De conseguilo serían as primeiras en ver a luz nesta lexislatura.
Pero o reto é maiúsculo. “Presentar os orzamentos é presentar os orzamentos”, advertiu Montero ante o anuncio de Pedro Sánchez e as dúbidas suscitadas sobre se iso significa rexistralos no Congreso, unha vez aprobados polo Consello de Ministros. E advertiu:
“A algo tan complexo como elaborar unhas contas públicas non se pode dar a saída se non é coa seguridade de que hai capacidade de poder aprobalo; ese é o ánimo do Ministerio de Facenda, o meu propio e o do conxunto do Goberno. Oxalá poidamos ter unhas contas públicas para o ano 2026, que sería moi bo”, confiou.
No Partido Popular poñen o que está a pasar cos orzamentos como exemplo da incapacidade deste goberno para ocuparse dos verdadeiros problemas dos españois
O líder do PP Alberto Núñez Feijóo definiu como bienio negro amargo os dous últimos anos de goberno de Pedro Sánchez, que serviron, ao seu xuízo, para que ao sanchismo lle caia a careta, e concluíu que a este Goberno lle sobra lexislatura e a España lle sobra este Goberno.
Así o expresou durante o balance do curso que realizou nunha conferencia de prensa na sede nacional do partido, onde volveu reprochar a Sánchez que non teña a valentía de convocar eleccións porque sabe que se o fai perdería.
"Cando nos dixo que estaba disposto a gobernar con ou sen o Parlamento non estaba mentindo", engadiu, e recriminoulle o nivel de degradación ao que, ao seu xuízo, levou ás institucións. E é que, na súa opinión, nunca houbo tanta diferenza entre a vocación de servizo do PP e a "podremia que impregna todo o que rodea os socialistas".
Feijóo acusou ao presidente do Goberno Pedro Sánchez, de abandonar as mulleres, tapar casos de abusos e convivir con prostíbulos e equiparou o sanchismo co machismo.
"Sánchez non só conviviu con prostíbulos na economía familiar, senón que o seu Goberno pagou prostitutas con diñeiro público e a prostitución é unha constante en todos e cada un dos casos de corrupción que o rodean", asegurou Feijóo.
