Falece un ciclista tras chocar cun portal no barrio do Peruleiro, na Coruña
O accidentado xa falecera cando chegou ao lugar unha UVI móbil avisada polo 112
Este domingo pola tarde falecía un ciclista na Coruña tras chocar contra o portal dun edificio do barrio do Peruleiro.
O home tiña 36 anos. Descendía na bicicleta por unha rúa con moito desnivel. Aínda non está claro o motivo polo que non xirou á esquerda no cruzamento e bateu contra a casa. A Policía intenta esclarecer se o accidente se debeu a un fallo nos freos, a un exceso de velocidade ou a unha combinación dos dous factores.
A UVI móbil alertada polo 112 non puido facer nada por salvarlle a vida, pois cando chegou o home xa morrera.
A Policía Local da Coruña investiga as circunstancias do tráxico suceso e analiza a bicicleta para determinar se houbo algún fallo mecánico.
