Falece un ancián na Coruña ao caer polas escaleiras no interior do garaxe que rexentaba

Pasaban das sete e media da tarde deste xoves cando o propietario dun garaxe da avenida de Oza, no barrio coruñés dos Castros, sufriu unha caída de xeito accidental nas escaleiras do interior do local. 

"Aí hai unha oficina e para ir a ela hai que subir por unhas escaleiras que están moi empinadas. E caeu", conta unha veciña.

A súa muller presenciou o accidente e, sen perder un intre, pediu auxilio.

"A muller empezou a berrar e aí xuntouse moita xente". "Viñeron varias ambulancias, pero non puideron facer nada. Xa falecera".

Un suceso que causou pesar e conmoción entre os veciños.

"Era moi boa persoa. Sempre estaba aí sentado á porta do garaxe coa súa muller". "Dá moita pena".

Fontes policiais confirmaron que se tratou dun accidente fortuíto e desbotaron calquera indicio delituoso.