Evenepoel dá un golpe de autoridade na penúltima etapa de montaña

Remco Evenepoel ratificou a súa condición de líder na penúltima etapa de montaña da Vuelta a España. O ciclista belga deu un golpe de autoridade na subida ao Piornal, porto de primeira categoría en que terminaba a etapa. 

Era unha das últimas oportunidades para poñer en problemas o xersei vermello, e Evenepoel superouna con nota.

O día empezou con susto, unha caída masiva en que se viron implicados Carlos Rodriguez, cuarto na xeral, e o líder da montaña Jay Vine, que tivo que abandonar a carreira.

A última ascensión converteuse nun man a man entre os dous primeiros da clasificación. Evenepoel deu unha nova mostra de forza. Saltou a todos os ataques que lanzou Enric Mas e mesmo contraatacou. Evenepoel volveu demostrar ser o máis forte, gañou a etapa e sacoulle dous segundos na liña de meta a Mas, que agora está a 2:07.