Europol acaba co foro de datos roubados LeakBase, con ramificacións na provincia da Coruña
O operativo deixa un rexistro na provincia da Coruña e outro en Biscaia, co arresto dun usuario e a detención pendente de outra persoa
LeakBase era un dos principais foros de compravenda de datos persoais, empregados para fraudes, suplantacións e ciberataques
Unha operación internacional contra o foro de datos roubados coñecido como LeakBase deixa un rexistro na Coruña, amais doutro en Biscaia. O operativo, coordinado por Europol en 14 países, contou coa participación da Policía Nacional e da Garda Civil.
LeakBase era un dos principais foros de compravenda de datos persoais procedentes, en gran medida, de bases datos de grandes compañías e de equipos domésticos infectados con diferentes tipos de malware, que eran empregados para fraudes, suplantacións e ciberataques, que contaba con máis de 142.000 usuarios.
Tal e como explican as forzas de seguridade nun comunicado, en España levouse a cabo unha detención e eses dous rexistros nas provincias da Coruña e Biscaia nos que se interveu numeroso material informático e documentación.
O foro era accesible desde a clearweb e activo desde 2021 contaba con contido predominantemente en inglés, combinando elementos dun foro ao uso, con elementos propios dun mercado, no que se permitía a compra, venda e intercambio de datos persoais.
Este foro aglutinaba gran cantidade de información, incluíndo pares de credenciais (correo electrónico e contrasinal) que eran posteriormente utilizados para a comisión de novos feitos delituosos, como o roubo de contas, fraudes ou accesos ilícitos a sistemas informáticos.
O foro consolidouse como un centro crave no ecosistema do cibercrime, especializado no comercio de bases de datos filtradas e os chamados stealer logs, arquivos de credenciais roubadas mediante un programa malicioso de roubo.
LeakBase mantiña un amplo repositorio, en constante actualización, de bases de datos comprometidas, que abarcaban desde filtracións antigas ata información recentemente vulnerada.
Operaba mediante un sistema interno que favorecía a xeración de confianza entre os membros e sostiña unha activa comunidade clandestina. Entre as súas normas internas destacaba a prohibición expresa de vender ou publicar datos relacionados con Rusia.
En decembro de 2025, LeakBase contaba con máis de 142.000 usuarios rexistrados, preto de 32.000 publicacións e máis de 215.000 mensaxes privadas, cifras que evidencian a súa dimensión e proxección internacional.
Entre os días 3 e 4 de marzo leváronse a cabo actuacións coordinadas en múltiples xurisdicións que permitiron desarticular a operativa do foro e actuar contra os seus usuarios máis activos. Entre os países participantes atopábanse autoridades de Australia, os Estados Unidos, O Canadá, Bélxica, Alemaña, Grecia, Kosovo, Malaisia, os Países Baixos, Polonia, Portugal, Romanía, España e o Reino Unido.
Na fase operativa, as autoridades realizaron actuacións coordinadas en múltiples xurisdicións. Levaron a cabo preto de 100 operacións e medidas dirixidas contra 37 dos usuarios máis activos da plataforma.
En España identificáronse dous usuarios con avanzados coñecementos técnicos que, presuntamente implicados na investigación, implantaran complexos sistemas de anonimización e desenvolvemento de técnicas avanzadas para ocultar a súa pegada dixital e dificultar a súa localización.
Unha vez identificados levou a cabo o arresto dun deles, permanecendo o segundo pendente de localización e detención, e o rexistro dos seus domicilios nas provincias da Coruña e Bizkaia, onde os axentes interviñeron numeroso material informático e documentación.
Como parte da investigación, as autoridades incautáronse da base de datos do foro, o que permitiu a desanonimización de numerosos usuarios que crían operar de maneira anónima.
Os axentes continúan rastrexando activamente as pegadas dixitais para identificar máis infractores e establecer as súas identidades no mundo real.
