Publicador de contidos

Publicador de contidos

España pedirá a Bruxelas prolongar a excepción ibérica polo menos ata finais de 2024

España pedirá a Bruxelas prolongar a excepción ibérica polo menos ata finais de 2024

O Goberno debate este martes a reforma do mercado eléctrico que pedirá á UE

G24.gal 09/01/2023 11:34 Última actualización 09/01/2023 12:16

A vicepresidenta terceira do Goberno e ministra de Transición Ecolóxica e para o Reto Demográfico, Teresa Ribera, adiantou este luns que o Excutivo vai solicitar a Bruxelas prolongar a 'excepción ibérica' polo menos ata finais de 2024, cun tope similar ao actual, de entre 45 e 50 euros por megawatt hora (MWh).

A excepción ibérica, que se aplica en España e Portugal desde o 15 de xuño pasado, é un mecanismo que lle pon un tope ao prezo do gas que se emprega en xerar electricidade e desa forma abaratar o prezo da luz.

A vicepresidenta Ribera, en declaracións a Antena 3 recollidas por Europa Press, subliñou que ata que non se produza a reforma da regulación do mercado eléctrico en Europa, o cal pode levar "moito tempo", España "quere seguir beneficiándose" da 'excepción ibérica'.   

"Imos presentar á Comisión propostas para a modernización do sistema eléctrico, pero tamén a extensión da excepción ibérica máis alá de maio de 2023, ata tanto dure esta crise e ata tanto non se actualizou a regulación europea (...) Gustaríanos que (o tope ao gas) quedase na contorna máis baixa posible, 45 ó 50 euros MWh, e que se poida prolongar polo menos ata o final de 2024", afirmou.

Ata o de agora, e durante os seis primeiros meses de vixencia desta medida, ao prezo do gas púxoselle un tope de 40 euros/MWh e a partir de aí, vaise incrementar en cinco euros/MWh ao mes ata o próximo mes de maio, cando finaliza a vixencia desta medida.

A vicepresidenta terceira insistiu na necesidade de modificar o sistema eléctrico europeo para reducir a volatilidade no prezo da electricidade e abaratala. Nese sentido explicou que os "vaivéns" no prezo da luz dependen moito de canto gas se necesita para producir, de forma que cando hai moita xeración de enerxía renovable, os prezos caen, pero cando se precisa máis gas para producir electricidade, os prezos soben.

Ribera indicou que a evolución dos prezos da electricidade viuse favorecida no outono e o principio do inverno polas "suaves" temperaturas, o que contribuíu a que os almacéns de gas estean cheos na inmensa maioría do territorio europeo ou na contorna do 85 % ou o 90 %.

Desta forma, destacou que Europa encara esta segunda metade do inverno e o principio da primavera "en moi boas condicións", e que debe prepararse para o que poida ocorrer o próximo outono.

Con todo, a pesar de que as temperaturas axudaron, a meteoroloxía non o fixo, pois, segundo precisou Ribera, a falta de auga obrigou a producir "moita máis electricidade" para garantir a subministración eléctrica a Portugal ou apoiar aos consumidores franceses. "Tivemos que utilizar máis gas do que normalmente necesitásemos a pesar de que o noso consumo interno baixou de maneira importante", explicou.

O Goberno debate mañá a reforma do mercado eléctrico que pedirá á UE

Pola súa parte, o presidente do Goberno, Pedro Sánchez, anunciou que o Consello de Ministros debaterá este martes a proposta de reforma do mercado eléctrico que España vai enviar á Unión Europea.

Sánchez sinalou que terá un dobre propósito, o primeiro deles facilitar a despregadura das enerxías renovables que son as que dixo que garantirán a autonomía enerxética "fronte á chantaxe de Putin".

O segundo propósito é que haxa unha repartición equitativa de rendas entre consumidores e produtores de enerxía nunha situación de tensión e de crise dos mercados de materias primas.

Sánchez avanzou que este martes tamén se vai aprobar un decreto para regular a participación en catro proxectos de hidróxeno verde que vai liderar España na UE. O presidente do Goberno precisou que España vai liderar catro das once iniciativas deste tipo en toda a UE.

Ademais, sinalou que eses proxectos inclúen subvencións provenientes dos fondos europeos por un total de 74 millóns de euros.

Publicidade
Publicidade
Publicidade
Publicidade