Publicador de contidos

España promete destinar 1.350 millóns de euros desde 2025 contra a emerxencia climática

España promete destinar 1.350 millóns de euros desde 2025 contra a emerxencia climática

O presidente do Goberno anunciouno no cumio da COP-26

Intervención de Pedro Sánchez na COP26
G24.gal 01/11/2021 16:23

Pedro Sánchez anunciou este luns ante a COP26 o compromiso de España de aumentar un 50 por cento a súa achega ao Fondo Verde do Clima ata chegar aos 1.350 millóns de euros anuais a partir de 2025 (máis de 1.560 millóns de dólares ao cambio actual).

Este fondo nútrese de achegas aos países en desenvolvemento por parte dos máis industrializados para axudarlles a adoptar medidas que favorezan a loita contra o cambio climático, e o compromiso da comunidade internacional é destinar anualmente a ese obxectivo 100.000 millóns de dólares (algo máis de 86.000 millóns de euros).

Sánchez foi o primeiro dos líderes asistentes ao cumio en intervir ante o plenario tras a sesión inaugural deste evento e lanzou unha mensaxe á comunidade internacional pedindo máis ambición para lograr as metas fronte ao cambio climático.

Elevar a ambición dixo que supón apoiar obxectivos con recursos e, por iso, considerou que o cumprimento dos 100.000 millóns de dólares anuais será unha das "probas de lume" da COP26.

"Comprometémonos a aumentar o financiamento climático para chegar en 2025 cun incremento dun 50 por cento respecto do noso compromiso actual", indicou Sánchez.

Da mesma forma, tal e como lembrou tamén no cumio do G20 celebrada en Roma esta fin de semana, subliñou que España destinará o 20 por cento dos seus dereitos especiais de xiro a países vulnerables. Iso implica, segundo sinalou o presidente do Goberno español, que se destinará por esta vía un mínimo de 350 millóns de euros (uns 405 millóns de dólares).

Publicidade
Publicidade
Publicidade