ERC ve "moi verdes" as negociacións para investir a Pedro Sánchez
ERC ve "moi verdes" as negociacións para investir a Pedro Sánchez
Os independentistas dan por feita a amnistía, pero piden avanzar na autodeterminación
O PSOE insiste en que calquera acordo pasa polo encaixe constitucional
A conselleira da Presidencia da Generalitat, de ERC, asegura que as negociacións co PSOE para a investidura de Pedro Sánchez están "aínda moi verdes".
Os republicanos dan por feito que haberá amnistía pero reclaman avances noutros eidos coma a autodeterminación para resolver "o conflito político" e en cuestións relacionadas co benestar dos cidadáns coma o traspaso de Rodalies (proximidades) ou o déficit fiscal.
Os socialistas ven o vaso medio cheo. O ministro da Presidencia en funcións, Félix Bolaños, asegura que as negociacións "seguen avanzando" e sae así ao paso das voces que din que están encalladas. Bolaños sinala que se está traballando duro e garante que todo o que se pacte será "impecable" desde o punto de vista constitucional.
Os socialistas admiten que as negociacións son difíciles e complexas pero sosteñen que seguen a liña que se pensaba desde o comezo. Non se marcan datas para rematalas. O único límite temporal é o 27 de novembro, a data máxima para evitar unha repetición electoral. Polo tanto, nin agora están paralizadas, nin antes avanzaban tan rápido, sosteñen desde o Goberno.
Mentres agarda que frutifiquen os contactos, Pedro Sánchez, segue escoitando a sociedade civil. Este mércores reuniuse con organizacións educativas, ecoloxistas e científicas. Tempo de espera que mantén paralizada a actividade política no Congreso. E o PP denuncia que non é casual. Acusan a presidenta Armengol de secuestrar a cámara en beneficio do PSOE.