Douvikas marcha cara a Italia e o Celta non incorpora ningún substituto
O dianteiro grego atopou acomodo no Como, que dirixe Cesc Fàbregas, por unha cantidade duns 13 millóns de euros
Rematou a aventura do grego Tasos Douvikas no Celta. O xogador pedira marchar no mes de decembro por non contar con minutos e acabou logrando o seu obxectivo nas últimas horas do mercado. O Como italiano, que dirixe Cesc Fàbregas, puxo unha cantidade arredor dos 13 millóns de euros para levar o dianteiro e substituír así a Andrea Belotti que se foi con destino ao Benfica.
Douvikas chegou a Vigo no verán de 2023 despois de marcar 18 goles no Utrecht dos Países Baixos. A primeira temporada no Celta anotou 13 goles malia non ser titular. Destacou sobre todo nunha Copa na que o equipo chegou aos cuartos de final. Este ano, coa saída de Strand Larsen, parecía que ía ter un oco como dianteiro titular, pero a chegada de Borja Iglesias quitoulle os minutos que desexaba. Tan só puido marcar 5 goles, 3 deles na Liga, e non acabou de sentirse a gusto no equipo.
O Celta recupera o investimento pero queda debilitado no aspecto deportivo porque non incorpora ningún substituto. En total, marcharon Bamba, Luca de la Torre, Aidoo, Allende e Douvikas e chegaron El Abdellaoui, que alternará entre o filial e o primeiro equipo, e Iker Losada.
