Montero di que "é prematuro" decidir sobre a OPA do BBVA; Díaz cre que o Goberno debe parala

A vicepresidenta María Jesús Montero sinalaba este xoves que "ainda é cedo" para tomar unha decisión sobre a OPA do BBVA ao Banco Sabadell. Un asunto, dixo, do que se enteraron, a través dos medios.

A vicepresidenta segunda do Goberno e ministra de Traballo e Economía Social, Yolanda Díaz, cre que desde o Goberno débese paralizar a oferta pública de adqusición (OPA) de BBVA a Banco Sabadell, que recibiu nas últimas horas luz verde por parte da Comisión Nacional dos Mercados e a Competencia (CNMC), e que agora está pendente de ser aprobada no Consello de Ministros.

Díaz volveu a cualificar como moi mala noticia esta futura fusión que cre que o que fai é "reforzar aínda máis" o oligopolio financeiro que existe en España e agudizar o risco sistémico do que xa alertou a Comisión Europea.

Así, fixo un chamamento para poñerse ao lado do ben común fronte a esta operación, xa que considera que vai ter "unha afectación moi negativa" ao emprego, aos servizos públicos e á situación económica de España.

Precisamente, en materia laboral, Díaz lamentou que vai ter efectos nocivos, porque se están expondo ao redor de 5.000 despedimentos no sector polo peche de oficinas. Estes peches, ademais, van agudizar "un grave problema democrático" en España como é a exclusión financeira. "Hoxe é imposible vivir sen acceso ás entidades financeiras, por tanto, vai haber un risco crave nesta materia", advertiu.

 

Ademais, tachou de "erro maiúsculo" facer esta operación en contra de todo o tecido económico, social, cultural, sindical catalán e animou ás patronais empresariais a expresar a súa opinión, ao considerar que a OPA vai en contra dos intereses maioritarios de España e da "democracia económica".