Detido en Arteixo Vázquez Patiño, reclamado por pederastia e un dos 10 máis buscados de España
Está reclamado por abusos e agresións sexuais a unha nena de 10 anos
A Policía Nacional detivo en Arteixo a Daniel Vázquez Patiño, reclamado por abusos e agresións sexuais a unha nena de 10 anos.
Durante o arresto, Patiño tentou acoitelar un axente do Grupo Operativo Especial (GOE) que formaba parte do dispositivo habilitado para a detención.
O home, de 46 anos, figuraba na lista de dez máis buscados pola Policía.
Nunha nota emitida o pasado novembro, o Ministerio do Interior describiu este delincuente como “altamente perigoso”.
Era un dos tres fuxitivos galegos máis buscados, xunto a Martiño Ramos, o profesor arrestado en Cuba tras fuxir a esa illa despois de ser condenado a 13 anos de prisión por abusos sexuais con sadismo a unha menor, ademais do traficante Juan Miguel García Santos.
Da lista dos dez, coa detención de Vázquez Patiño xa caeron cinco dos dez máis buscados de 2025.
