Detido un veciño de Tomiño como suposto autor dun roubo con forza nunha vivenda

O Equipo EBIO da Garda Civil de Tui detivo a un veciño de Tomiño, de 55 anos de idade, como presunto autor dun delito de roubo con forza cometido nunha vivenda unifamiliar da mesma localidade, ocorrido o día 27 de maio.

A investigación iniciouse tras unha denuncia interposta polo propietario da vivenda e as pescudas permitiron identificar ao suposto autor, do que a Garda Civil sospeita que utilizou unha chave falsa obtida ilicitamente.

O sospeitoso, con numerosos antecedentes policiais, foi detido o pasado martes. Os axentes puideron recuperar varios obxectos, como un televisor, un deshumidificador e a chave de acceso á vivenda.

As dilixencias foron postas en coñecemento do tribunal de instancia de Tui, onde terá que comparecer o investigado cando sexa requirido.