Detidas 29 persoas acusadas da presunta autoría de 287 graffiti en trens
O prexuízo económico dos graffiti está avaliado en case 1,5 millóns
A Policía Nacional detivo 29 persoas como presuntas autoras de 287 graffiti en trens. O prexuízo económico polos danos ocasionados ascende a case 1,5 millóns de euros.
Os arrestos realizáronse en distintas provincias da xeografía española, concretamente 18 persoas en Madrid, 4 en Málaga, 2 en Valencia, 2 en Barcelona, 1 en Alacante, 1 en Soria e 1 en León.
A operación requiriu unha importante coordinación de diferentes unidades policiais e permitiu esclarecer un total de 319 accións constituíntes de delito: 187 delitos de danos e 32 de desordes públicas.
Os investigados caracterízanse, segundo a Policía Nacional, polo seu alto grao de profesionalización, xa que estudan minuciosamente os horarios e frecuencia dos trens e a distancia de freado, e contan con todo tipo de ferramentas, útiles e chaves mestras, así como pola itinerancia das súas accións delituosas.
A investigación iniciouse en setembro de 2024 tras a recepción de numerosas denuncias por graffiti realizados en trens e instalacións, de diversas cidades de España, entre os anos 2024 e 2025.
Os investigados destacan por facer unha utilización profesional de dispositivos de gravación, cos que recollían as súas fazañas delituosas, e das redes sociais onde as publicaban.
A comunidade de Madrid é a máis atractiva para os graffiteiros
As pescudas evidenciaron que Madrid, ao contar con importantes vías de comunicación e infraestruturas ferroviarias, convértese nun lugar moi atractivo que atrae graffiteiros nacionais e internacionais.
Por este motivo, e por mor das denuncias analizadas polos danos ocasionados en trens e instalacións da capital, os axentes realizaron un dispositivo destinado á localización e detención dos seus autores. Por iso é onde houbo máis detidos, en total 18 persoas en distintas localidades da Comunidade de Madrid; en concreto en San Sebastián de los Reyes, Alcobendas, Torrejón de Ardoz, Galapagar, Boadilla del Monte, Móstoles, Leganés e Xetafe. Os detidos serían presuntos responsables dos delitos de danos e desordes públicas en trens de proximidade.
Tamén se emitiron tres ordes de busca e detención. Os axentes esclareceron un total de 220 feitos delituosos -188 delitos de danos e 32 de desordes públicas-, ascendendo o prexuízo económico xerado a 1.026.412 euros.
Coordinación entre unidades policiais
O marcado carácter itinerante dos investigados, e da súa actividade criminal, esixiu unha gran coordinación de diferentes unidades policiais. En Málaga, tras un ano e medio de investigación, os axentes detiveron outras catro persoas e esclareceron un total de 48 feitos delituosos que ocasionaron perdas económicas por valor de 205.728 euros.
O modus operandi empregado revelou que os arrestados quedaban previamente en estacións illadas -en localidades de toda a Comunidade Autónoma de Andalucía como Álora (Málaga), Antequera (Málaga), Espeluy (Xaén) ou Jabugo (Huelva)- e aproveitaban as paradas dos trens, ou as zonas de talleres dos mesmos, para realizar os graffiti.
En Asturias os axentes esclareceron cinco delitos de danos por pintadas, graffiti, en trens e identificaron tres individuos como autores dos mesmos. A valoración dos danos ascende a 25.069 euros.
A mediados do mes de maio tamén se despregaron varios dispositivos policiais en distintas cidades españolas para localizar e deter os autores de diversos graffiti realizados en vagóns de tren e metro de diferentes operadores de transporte.
Como resultado dos mesmos, os axentes esclareceron 46 delitos de danos — que xeraron un prexuízo económico de 204.136 euros— e detiveron sete persoas máis, dúas en Valencia, dúas en Barcelona, unha en Soria, unha Orihuela (Alacante) e outra máis en Ponferrada (León).
