Detida unha muller acusada de causar incendios en Verín que arrasaron casas e coches
A detida ingresou en prisión, tras declarar no xulgado, acusada de cinco delitos de incendios e sete de danos
Arquivo: Un incendio con ata dez focos do que non se dubidaba da intencionalidade
Detivérona na súa propia casa, tras pouco máis dun mes de investigacións. Non se recoñece autora, pero non opuxo resistencia. No xulgado decretaron o seu ingreso inmediato en prisión, á vista das probas achegadas polos investigadores.
José Manuel Miñones, delegado do Goberno en Galicia: "Que se saiba que aquel que queima o monte terá a súa consecuencia".
A Garda Civil detívoa como suposta autora de cinco delitos de incendio forestal e sete delitos de danos, polas vivendas e vehículos afectados, na comarca de Verín. A superficie calcinada polo lume é de 1.000 hectáreas.
Tras ser posta a disposición xudicial, o titular do Xulgado número 1 de Verín decretou o ingreso en prisión provisional da detida por estes feitos.
Fontes da investigación detallaron que se trata dunha traballadora do Concello de Verín, de 50 anos, e que realizaba labores de operaria.
Segundo informa a Garda Civil nun comunicado, os incendios producíronse os días 3 e 4 de agosto e afectaron as poboacións de Verín, Rasela, Cabreiroá, Ábedes e Sousas. A Consellería de Medio Rural detalla que estes múltiples focos uníronse nun só lume. De feito, chegou a declarar o nivel 2 de emerxencias debido á proximidade das chamas ás vivendas e ás zonas afectadas.
"Ardeume toda a viña, do alto ao fondo, unhas cincuenta vides, pora aí. Mellor non recordalo, porque aquilo era un inferno", comenta un veciño de Ábedes.
Nos incendios diferentes persoas tiveron que recibir asistencia médica e quedaron calcinadas varias vivendas e vehículos.
As pescudas iniciáronse cando se realizaban labores de control e extinción. Así, a muller utilizaba o seu vehículo para desprazarse polo municipio e foi vista en varias ocasións polos investigadores polas zonas de inicio dos incendios.
"Esta rápida chegada ao lugar e a colaboración da cidadanía foron fundamentais no avance das investigacións", resalta Medio Rural.
Na investigación, a Garda Civil contou coa estreita colaboración dos axentes da Unidade de Investigación de Incendios Forestais (UIFO), da Xunta de Galicia.
Nun comunicado, o Goberno galego destaca o traballo dos investigadores para esclarecer o sucedido.
José González, conselleiro do Medio Rural: "Tamén quero deixar claro que hai máis liñas de investigación abertas, máis xente investigada, imos por eles con todo o peso da lei, todos traballando conxuntamente".
A detida nesta ocasión enfróntase a penas de cárcere e con responsabilidade patrimonial. Os gastos de extinción superaron o medio millón de euros, ao que se suman os danos ocasionados.
