Descobren dúas especies inéditas en Galicia nun estudo no Pazo de Mariñán
O estudo realizado pola Federación Galega de Micoloxía achou no pazo coruñés tres especies de cogomelos, dúas delas nunca vistas o que reforza as medidas de conservación para protexer o histórico espazo
Especie de cogomelo inédita en Galicia encontrada no Pazo de Mariñán, en Bergondo (Imaxe da Deputación da Coruña)
Un estudo realizado pola Federación Galega de Micoloxía constatou a existencia de dúas especies inéditas en Galicia, nun estudo promovido no Pazo de Mariñán, propiedade da Deputación da Coruña e situado no municipio de Bergondo.
Segundo traslada o ente provincial, a primeira saída de campo do estudo realizado pola Federación Galega de Micoloxía saldouse cun "gran descubrimento científico". Foi a localización de "tres especies de cogomelos de especial rareza, dúas delas inéditas ata o momento no catálogo galego: a Microglossum truncatum e a Glutinoglossum triseptatum".
"Este achado non só valida o interese científico do estudo, senón que reforza a necesidade das medidas de conservación que a institución provincial está a poñer en marcha para protexer o medio natural neste histórico espazo", indica a institución.
Esta análise no Pazo estenderase de xaneiro a decembro de 2026 e conta cun dobre obxectivo: científico e conservacionista. A identificación detallada das especies servirá de base para elaborar mapas de hábitats e materiais divulgativos que "sinalen as especies de valor e a prohibición expresa de recolección de cogomelos, así como de alteración do medio".
Noutra orde de cousas, o presidente da Deputación da Coruña, Valentín González Formoso, e o presidente da Asociación de Persoas Adictadas e Familiares Adiante das Pontes, Roberto Fernández, asinaron un acordo de colaboración para o financiamento do proxecto de prevención familiar 'En familia, tod@s contan'.
A iniciativa está dirixida a familias en situación de vulnerabilidade fronte ao consumo de substancias adictivas.
Xa en materia de infraestruturas, a Deputación da Coruña adxudicou as obras de construción da nova ponte no punto quilométrico3+100 da estrada DP 8001 sobre o río Mandeo, no municipio de Sobrado dos Monxes, por 1.271.178,80 euros.
