Desaloxan o centro comercial As Cancelas, en Santiago, por un incendio na azotea

Un incendio nunha máquina de aire acondicionado de Primark situada na azotea do centro comercial As Cancelas, en Santiago, obrigou a desaloxar as instalacións.

Sobre as 14,00 horas un particular alertou de que vía saír fume dun tellado nesta zona. Fontes do centro comercial resaltaron sobre as 16,00 horas que a actuación foi rápida e que xa estaba garantido o 100% da actividade.

Ao redor das 14,00 horas, seguridade do centro comercial tamén se puxo en contacto coa central de emerxencias para dar aviso dun incendio na zona da azotea e comunicar que ían proceder á evacuación das instalacións, aínda que non había persoas afectadas.

Ata o lugar desprazáronse dotacións dos Bombeiros de Santiago e efectivos da Policía Nacional, Policía Local e Protección Civil. Tamén a alcaldesa, Goretti Sanmartín, e o concelleiro Xan Duro acudiron ata o lugar para coñecer de primeira man e interesarse polo operativo e polo desaloxo do centro.

Fontes municipais sinalaron que todo se realizou "en orde". Os establecementos do centro comercial realizan simulacros de incendio e evacuación periodicamente, e a situación quedou normalizada sobre as 15,30 horas.

Pola hora na que ocorreu, o incidente coincidiu co cambio de quenda de numerosos traballadores e o centro comercial rexistraba actividade nos locais de restauración.

 "Houbo un estrondo, un ruído moi duro, como se caera unha prancha metálica. Activáronse as alarmas e pensamos que era un simulacro". "Empezamos ver como fume de arriba, pensamos que non ía ser nada pero finalmente tiveron que evacuar", contan algunhas testemuñas.

O desaloxo durou pouco máis dunha hora. Primeiro entraron os responsables das tendas e despois o resto dos traballadores e o público.

"Eu con moita ansiedade porque miña nai é traballadora do centro e non sabiamos a gravidade do incendio, se estaba ben", contan.