Desactivan o nivel 2 en Vilardevós, co incendio estabilizado, situación en que tamén están os de Ponteceso
Desactivan o nivel 2 en Vilardevós, co incendio estabilizado, situación en que tamén están os de Ponteceso
O incendio que afecta a parroquia de Terroso, en Vilardevós, queimou polo momento unha superficie de 570 hectáreas
A primeira hora desta mañá pasaba a estar estabilizados os incendios que afectan o concello coruñés de Ponteceso, que entre todos queimaron xa unhas 470 hectáreas
A Xunta de Galicia desactivou esta noite o nivel 2 de emerxencia no incendio de Vilardevós ao reducirse o risco para os núcleos de poboación de Dona Elvira e Enxames.
O lume que comezou en tres focos o sábado á noite, tal e como apuntou a conselleira de Medio Rural, María José Gómez, estaba estabilizado tras queimar xa 570 hectáreas na parroquia de Terroso.
Para a súa extinción mobilizáronse nos últimos días 7 técnicos, 49 axentes, 71 brigadas, 48 motobombas, 6 pas, 12 helicópteros e 12 avións.
Ademais, foi necesaria a intervención da Unidade Militar de Emerxencias (UME), que xa se retirou da zona pola evolución positiva do incendio.
Incendios en Ponteceso
Esta maña declaráronse estabilizados dous incendios en Ponteceso: un na parroquia da Graña, que comezou esta madrugada do sábado para o domingo e afecta a unhas 100 hectáreas e outro en Brantuas, que xa queimou 170 hectáreas e empezou ás 20:30 horas do sábado.
Un terceiro incendio nese concello, en Cospindo, que se iniciou pasadas as 16:00 horas do sábado e afecta 200 hectáreas, está estabilizado desde minutos antes das 20:00 horas.
Vilar de Barrio e Caniza
Este luns quedou extinguido outro incendio no concello ourensán de Vilar de Barrio, na parroquia de Rebordechao, que anda nas 34 hectáreas afectadas.
A Consellería do Medio Rural informou de que o incendio da Caniza, que estaba estabilizado desde a tarde do venres, declarouse extinguido na tarde deste domingo, dous días despois de que se desactivase a situación 2 pola súa proximidade a núcleos de poboación.
O lume desa localidade pontevedresa afectou a 295 hectáreas, das que 220 son de monte arborizado e 75, raso.
Tamén lograron extinguir o de Porto do Son, na parroquia de Miñortos, tras queimar 28,3 hectáreas, e apagouse outro en Ribeira, que afectou minimamente (0,01 hectáreas) ao Parque Natural das Dunas de Corrubedo.
A Consellería do Medio Rural lembra que o número de teléfono gratuíto 085 está dispoñible para que a cidadanía avise de calquera incendio forestal.
Tamén existe un teléfono anónimo e gratuíto para denunciar actividades delituosas incendiarias: 900 815 085.
