Derrubadas as catro torres de refrixeración da central térmica das Pontes

A central térmica das Pontes entrou en funcionamento en 1972 e axiña chegou a producir o 7 % da electricidade do estado. En outubro de 2023 as caldeiras apagáronse para sempre, iniciando un proceso de desmantelamento que ten previsto rematar en xullo de 2028. Tardou catro anos en construírse e apenas en cinco estará desmantelada.

Este xoves foi a quenda da voadura das súas catro icónicas torres de refrixeración, co que a cheminea do complexo de 356 metros quedará a partir de agora como única testemuña do pasado industrial das Pontes. A operación, que afectou a catro estruturas de 99 metros de altura e un peso total de 45.000 toneladas, desenvolveuse baixo un estrito dispositivo de seguridade e cunha gran afluencia de público que seguiu o derrube cunha mestura de aplausos e nostalxia.

A manobra técnica estivo marcada por un intervalo de tempo entre as explosións. Produciuse un atraso duns 15 minutos entre a voadura do primeiro par de torres e o segundo, aparentemente debido a un problema de comunicación. A primeira detonación, que afectou as torres situadas á esquerda da fábrica, levantou unha densa fumareda que foi mitigada por 12 canóns de auga instalados para reducir o impacto ambiental.

Con todo, a voadura atraeu centos de persoas, entre veciños, familias e extraballadores, que se situaron nos arredores con prismáticos, cámaras e cadeiras para despedir as catro torres que xa formaban parte da paisaxe da localidade.

 

A xornada, que terminou baixo unha lixeira chuvia, provocou importantes retencións de tráfico nas vías de saída debido á gran cantidade de vehículos estacionados para presenciar o histórico momento.

Dada a envergadura da voadura, despregouse un amplo dispositivo que contou coa participación da Garda Civil, Policía Local, Protección Civil e Bombeiros. Ademais, o equipo Pegaso da Garda Civil supervisou o control de drons na zona afectada. 

 A caída destas estruturas, é o primeiro gran fito no proceso de desmantelamento. O que vai quedar en pé é a cheminea. No seu momento, foi unha das estruturas máis altas de Europa e foi a protagonista dunha campaña cidadá para salvala. Cun investimento de 55 millóns de euros, as obras chegan este mes ao seu ecuador co obxectivo de reciclar o 90% das 400.000 toneladas de refugallos e cumprir o prazo estimado de 45 meses de traballo.

En xullo de 2028 a desaparición da central deixará 55 hectáreas de solo industrial. O antigo parque de carbón prepárase para acoller unha bioplanta de fibras recicladas de ENCE. As Pontes despide o seu pasado de carbón e cunha nova paisaxe, dálle a benvida á economía verde. 

España continúa despedíndose da queima de carbón, que rexistra achegas próximas ou exactas ao 0 no mix diario de Rede Eléctrica.