Declarado culpable de asasinato e agresión sexual o autor confeso da morte de Elisa Abruñedo en Cabanas

O Tribunal do Xurado declarou por unanimidade a Roger Serafín Rodríguez culpable dos delitos de asasinato e agresión sexual pola morte de Elisa Abruñedo, acontecida en setembro de 2013 no municipio de Cabanas (A Coruña).

No seu veredicto, aprecia a existencia da agravante de aleivosía, que impide a defensa da vítima e marca a diferenza legal entre homicidio e asasinato.

O acusado confesou o crime dez anos despois, cando foi detido tras unha longa investigación da Garda Civil.

No xuízo, a Fiscalía solicitou 32 anos de prisión polos dous delitos. Pola súa banda, as acusacións particulares, en representación dos dous fillos da vítima, elevaron a petición a 37 anos, incluíndo agravantes como aleivosía, asañamento, abuso de superioridade e motivación de xénero.

A defensa recoñeceu a agresión sexual, pero argumentou que os feitos deberían cualificarse como homicidio.

"Nin eu mesmo o entendo", dixo o acusado

Na última sesión, o acusado manifestou na súa quenda final que aquel momento non tiña relación coa súa vida anterior e asegurou non poder xustificar o ocorrido. "Nin eu mesmo o entendo", dixo, sen pedir perdón malia as peticións da familia da vítima.

Segundo o relato acreditado no xuízo, o acusado sorprendeu a Elisa Abruñedo polas costas mentres paseaba preto da súa casa. Levouna a unha zona sen visibilidade desde a estrada, onde a agrediu sexualmente e lle asestou tres coiteladas no pescozo, pulmóns e corazón, sen que ela puidese defenderse.

O xurado considerou probados os feitos tras avaliar 14 puntos de forma unánime, segundo explicou a súa portavoz na lectura do veredicto.

Unha investigación de oito anos

A investigación, complexa e prolongada durante oito anos, contou unicamente con restos de ADN e coa pista dun coche Citröen ZX.

O perfil xenético apuntaba a un home pelirroxo e a unha rama familiar apelidada Fonticoba.

Finalmente, a Garda Civil relacionou esa liñaxe cos Rodríguez e, ao cruzar o apelido co vehículo, deu con Roger Serafín Rodríguez, veciño de Narón.

Aos investigadores chamoulle a atención que non participara na batida de busca que organizara a súa propia asociación cinexética o día dos feitos. Sen pedir unha mostra directa de ADN —por medo a que fuxise—, os axentes recolleron restos biolóxicos da manilla do seu coche, que deron positivo.

Foi detido no seu domicilio dez anos despois.