Reabre a A-8 no Fiouco sentido Vilalba tras dous accidentes por alcance
Catro vehículos víronse implicados nestes dous sinistros, que deixaron dous feridos leves
A circulación estivo interrompida case tres horas sentido Vilalba
A mesta néboa dificulta a circulación e o traballo dos equipos de emerxencia
A Autovía do Cantábrico (A-8) reabriu ao tráfico ás 13:00 horas tras permanecer cortada esta mañá durante tres horas en sentido Vilalba, Lugo, como consecuencia de dous accidentes rexistrados entre Mondoñedo e Abadín, no alto do Fiouco, entre os quilómetros 534 e 552.
Segundo o Subsector de Tráfico da Garda Civil de Lugo, trátase de dúas colisións por alcance con polo dous vehículos implicados en cada un dos sinistros. Como consecuencia dos impactos, dúas persoas quedaron feridas leves.
Segundo o 112, os alertadores advertiron que no momento dos accidentes a néboa dificultaba a circulación na zona.
#AXEGAInforma de 2 accidentes por alcance
— 112 Galicia (@112Galicia) July 4, 2025
📍A8, km. 547, #Mondoñedo
▶️Houbo 2 vehículos implicados en cada sinistro e feridos leves
▶️A néboa dificultaba a circulación, avisaron os alertadores
🚨Urxencias Sanitarias de Galicia-061, Bombeiros Barreiros, @guardiacivil de Tráfico https://t.co/TphBD7BAjM
Os alertadores deron a voz de alarma contra as 10:20 minutos da mañá. Advertiron da presenza de densos bancos de néboa que dificultaban moito a visibilidade na zona.
A autovía quedou cortada durante case tres horas para que os equipos de emerxencias desprazados puideran traballar en condicións “de seguridade”. Contra as 13:00 quedou aberta á circulación en ambos sentidos.
