Conta atrás na intermodal de Lugo: xuño, o mes previsto para concluír as obras

O delegado do Goberno en Galicia, Pedro Blanco, asegurou este luns que as obras da estación intermodal de Lugo estarán acabadas no mes de xuño. Así o trasladou nunha visita á capital lucense onde puxo en valor o traballo do ministro de Transportes Óscar Puente, no impulso de actuacións estratéxicas en Galicia, e especialmente en Lugo, onde a nova estación de tren atópase xa na súa fase final de execución.

Alí, o delegado recalcou que esta infraestrutura marcará "un antes e un despois" ao converter á cidade "nun nodo moderno, accesible e preparado para reforzar a súa conexión ferroviaria", enlazando coa alta velocidade.

Durante esta visita, o representante do Executivo central reivindicou que Lugo vive "o seu mellor momento e a súa maior transformación" en materia de infraestruturas, destacando o avance de proxectos crave grazas ao "traballo coordinado" do Goberno e do alcalde, Miguel Fernández. Segundo subliñou, están a cumprirse "todos os compromisos adquiridos" coa cidade.

Acompañado polo rexedor, pola subdelegada do Gobierno na provincia, Olimpia López, e responsables técnicos do Adif, Blanco explicou que o edificio de viaxeiros xa está practicamente finalizado na súa estrutura e peche, mentres que se ultiman as instalacións interiores e os sistemas técnicos.

Tamén avanzan os traballos nas plataformas, a pasarela peonil e o paso inferior, que servirá tanto de acceso como de conexión urbana, xa que une os barrios do Sagrado Corazón e As Gándaras co centro da cidade, "superando un illamento histórico e favorecendo un desenvolvemento máis equilibrado", tal e como expuxo o alcalde.

Igualmente, a contorna da estación atópase en proceso de urbanización. O Goberno central, a través do Adif, destinou máis de 22 millóns de euros a esta actuación e á súa integración urbana. Ademais, o delegado destacou o investimento global xunto co corredor ferroviario entre Lugo e Ourense, que supera os 600 millóns, e remarcou que estas actuacións permiten saldar unha "débeda histórica" coa cidade "tras anos de paralización en etapas anteriores".

Pola súa banda, o alcalde de Lugo, Miguel Fernández, engadiu que o Intermodal non só mellorará a mobilidade, senón que "supoñerá unha transformación urbana profunda". Anunciou a inminente firma dun convenio co Adif para executar a conexión entre a estación e a zona alta da cidade mediante ramplas e ascensores. Este proxecto contará cun investimento superior aos cinco millóns de euros, con financiamento europeo, aos que se suma un millón adicional achegado polo Concello para expropiacións.