Confírmanse os peores prognósticos para un Racing que perde os seus laterais
Pumar ten roto o ligamento cruzado anterior e ten moi difícil volver xogar esta temporada
Ferrone tamén pasará polo quirófano e agarda volver xogar no mes de xaneiro
Moi malas novas para o Racing de Ferrol. As lesións que sufriron ante o Córdoba os seus dous laterais titulares son de gravidade. Segundo confirmaron os servizos médicos do club, Pumar ten unha rotura do ligamento cruzado anterior e menisco interno, que o fará pasar polo quirófano e perderá seguramente toda a temporada.
Tamén pasará polo quirófano Luca Ferrone, que ten unha rotura do menisco interno, polo que probablemente non volverá pisar o campo ata final de ano. Dous problemas para Cristobal Parralo, que ve minguada a súa defensa. Veremos se o Racing decide ir ao mercado para contratar algún xogador que supla as dúas baixas.
