Condenan o expresidente colombiano Álvaro Uribe a 12 anos de prisión domiciliaria

O expresidente colombiano Álvaro Uribe, que gobernou entre 2002 e 2010, foi condenado a 12 anos de prisión domiciliaria polos delitos de fraude procesual e suborno en actuación penal. A sentenza, feita pública de xeito anticipado, impón tamén unha multa superior aos 3.400 millóns de pesos colombianos (uns 822.000 dólares) e unha inhabilitación de máis de oito anos para exercer cargos públicos.

A xuíza do Xulgado 44 Penal do Circuíto de Bogotá, Sandra Heredia, encargou ao Centro de Servizos Xudiciais de Rionegro -municipio do departamento de Antioquia onde reside Uribe- que tramite a orde de arresto e coordine o seu traslado inmediato á súa finca, onde cumprirá a condena baixo vixilancia.

Primeiro expresidente colombiano condenado penalmente

Álvaro Uribe, de 73 anos e fundador do partido de dereitas Centro Democrático, converteuse o luns no primeiro expresidente colombiano condenado penalmente no país. A súa defensa xa anunciou que recorrerá a decisión ante o Tribunal Superior de Bogotá.

Na audiencia previa, a xuíza indicara que a lei establece penas "superiores a catro anos e inferiores a oito" para os delitos imputados.

Porén, a fiscal Marlene Orjuela pedira unha condena de nove anos e unha multa de 1.025 salarios mínimos (1.458 millóns de pesos, uns 349.000 dólares). A sentenza final supera estas previsións, o que xerou sorpresa no país á espera da argumentación detallada que se dará a coñecer na lectura formal.

A sentenza, que supera as 1.100 páxinas, establece 91 meses de prisión polo delito de suborno en actuación penal, aos que se suman 29 meses máis pola participación de varias persoas -en concreto, tres testemuñas: Juan Guillermo Monsalve Pineda, Carlos Enrique Vélez Ramírez e Eurídice Cortés Velasco-, resultando nun total de 120 meses ou 10 anos.

No caso do fraude procesual, Heredia impón 104 meses, pero determina que o suborno actúa como delito base e engade dous anos máis polo fraude, sumando así unha pena definitiva de 144 meses (12 anos) de prisión.

Proceso iniciado por Uribe en 2012

A xuíza considerou que as probas achegadas pola Fiscalía foron suficientes para declarar culpable a Uribe polos delitos de suborno en actuación penal, en concurso homoxéneo en tres ocasións e en concurso heteroxéneo pola fraude procesual. Porén, resultou absolto dun terceiro delito, o de suborno simple.

Este proceso tivo a súa orixe en 2012, cando o propio Uribe denunciou o congresista de esquerdas Iván Cepeda por suposta manipulación de testemuñas. Porén, a Corte Suprema decidiu investigar o expresidente pola mesma acusación, tras rexeitar abrir causa contra Cepeda.