Conde-Pumpido admite que sempre hai presións por resolucións como a da amnistía

O presidente do Tribunal Constitucional, Cándido Conde-Pumpido, admitiu que os xuíces sempre reciben presións por resolucións como a da amnistía, aínda que non son necesariamente "directas", senón formas de expresar "política ou mediaticamente" o que deberían facer.

Conde-Pumpido foi preguntado, á marxe das XVIII Xornadas Xurídicas de Sarria (Lugo), sobre se "sempre" hai presións cando teñen que tramitar resolucións como a da amnistía.

"Sempre. Pero non necesariamente presións directas, senón algunha forma de expresar politica ou mediaticamente o que deberiamos facer", respondeu.

O maxistrado sinalou que o traballo dos xuíces é "verdadeiramente difícil", porque teñen que controlar o Poder Lexislativo "resolvendo problemas políticos con argumentos xurídicos".

"E ás veces non se comprende ben que nós só podemos actuar en función dos límites que establece a propia Constitución, pero que non podemos entrar en avaliacións políticas que non nos corresponden", dixo.

Iso significa que "en ocasións xa nos queren dicir antes de que poidamos deliberar o que temos que facer, pero nós levámolo con impavidez", afirmou.

E lembrou o expresidente do TC Francisco Tomás e Valente, que lles dicía que o tribunal "non pode estar pendente dos aplausos nin das críticas, porque toda decisión difícil levará aplausos e levará críticas, e procuramos levalos coa máxima tranquilidade posible".