Comunidades do PP rexeitan reunións bilaterais co Goberno sobre financiamento
Consideran que o Consello de Política Fiscal e Financeira debe ser o foro e non encontros deste tipo
O ministro de Facenda anunciou este luns a súa intención de iniciar reunións bilaterais de xeito inmediato con todas as autonomías
Os executivos rexionais de Andalucía, Murcia, A Rioxa, Aragón e Castela e León, todos do PP, xeitaron na mañá deste martes a proposta de reunións bilaterais para falar do novo sistema de financiamento que fixo o ministro de Facenda, Arcadi España.
O Goberno do socialista Emiliano García-Page en Castela-A Mancha, pola contra, acolleu positivamente a proposta de Arcadi España, ideada para avanzar nun novo modelo de financiamento autonómico.
As outras autonomías citadas consideran que o Consello de Política Fiscal e Financeira debe ser o foro e non encontros deste tipo. Así, o Goberno andaluz respondeu este martes que non acudirá a ningún encontro "bilateral" para negociar un novo sistema.
A portavoz do Goberno de Murcia, Marisa López, subliñou que a posición non cambiou e que Murcia, "a comunidade peor financiada do sistema actual", defende unha reforma do modelo de financiamento autonómico, pero nun marco multilateral.
Na mesma liña respondeu o portavoz do Goberno da Rioxa, Alfonso Domínguez, quen dixo que "o que é de todos debe negociarse nos órganos nos que están representados todos e cada un dos españois". O conselleiro de Facenda do Goberno de Aragón, Roberto Bermúdez de Castro, considerou que é "imposible" que saia adiante o sistema de financiamento autonómico que baralla o Executivo central
Tamén o presidente da Junta de Castela e León en funcións, Alfonso Fernández Mañueco, rexeitou a reunión bilateral xa que entende que se debe negociar "entre todos".
O Ministerio de Facenda anunciou este luns a súa intención de iniciar reunións bilaterais de xeito inmediato con todas as Comunidades Autónomas para abordar a reforma do financiamento autonómico, e informou de que remitiu a todas as consellerías de Facenda das autonomías de réxime común e de Ceuta e Melilla unha carta para concertar datas.
O ministro de Facenda, Arcadi España, mantén o compromiso de convocar proximamente un Consello de Política Fiscal e Financeira, que sería o paso previo á aprobación por parte do Consello de Ministros da reforma do sistema de financiamento autonómico e o inicio do trámite parlamentario co obxectivo de que se aprobe antes de finalizar o ano.
