Publicador de contidos

Publicador de contidos

Comezan as votacións pola Presidencia de Italia para substituír a Mattarella

Comezan as votacións pola Presidencia de Italia para substituír a Mattarella

Mario Draghi, o actual primeiro  ministro, parece o mellor candidato para ocupar o Quirinale, pero obrigaría a anticipar as eleccións xerais

G24.gal 24/01/2022 09:42

O Pazo do Quirinal precisa un sucesor para Sergio Mattarella. As votacións comezan hoxe pero por motivos da pandemia non se realizan, como é tradición, no lugar de residencia do presidente da República Italiana. Esta vez a decisión vai ser tomada no Pazo de Montecitorio, a sede da Cámara dos Deputados.

Os parlamentarios italianos comezan hoxe as votacións e prevese que será una batalla que pode durar uns tres días e que o resultado podería ter repercusións no actual Goberno, que mesmo podería implicar un adianto das eleccións.

Tras a retirada de Silvio Berlusconi, que se autoproclamara candidato, algo inédito na elección do Xefe de Estado, os 629 deputados, 321 senadores e 58 delegados rexionais convocados votarán case seguramente hoxe en branco ante a falta de indicacións por parte dos seus partidos, De momento continúan as xuntanzas en busca dun candidato que poida aglutinar unha maioría, sempre complicada en Italia.

Mario Draghi, o actual primeiro ministro, parece o mellor candidato para ocupar o Quirinal, pero aínda ningunha formación propuxo oficialmente o seu nome, xa que a súa elección supoñería unha crise de Goberno se non se atopa outra persoa de consenso e abocaría ás eleccións anticipadas.

Polo momento, o bloque progresista formado polo Partido Democrático (PD), o transversal Movemento Cinco Estrelas (M5S) e Libres e Iguais ( LeU) móvese de forma conxunta e os seus respectivos expoñentes Enrico Letta, Giuseppe Conte e Roberto Speranza reuníronse este domingo de novo en Roma para seguir buscando un candidato.  Avanzaron que nas próximas horas tratarán de impulsar unha mesa de negociación co resto de grupos en busca dun nome de consenso.

Unha das apostas dos progresistas, segundo os medios italianos, é o fundador da comunidade católica de San Egidio Andrea Riccardi, cuxa organización desde 1968 é un emblema de integración, de acollida aos refuxiados e da mediación en numerosas guerras. Pero aínda así non terían os votos necesarios e necesitarían convencer a Italia Viva de Matteo Renzi, cuxos parlamentarios se converteron na bisagra nesta elección tanto para a dereita como para a esquerda.

O bloque da dereita reivindica o "dereito" de ter en conta primeiro as súas ideas, avalado, alegan, polo feito de que controlan máis escanos no Parlamento, aínda que Letta xa rexeitou apoiar calquera candidato que proveña desta área.

Queda por ver se a ultradereita, Giorgia Meloni e Matteo Salvini, obedecen a última vontade de Berlusconi: manter o economista Mario Draghi á fronte do Goberno.

As votacións son complicadas, porque nas primeiras catro se precisan os tres cuartos do Parlamento para elixir o xefe de Estado. Só haberá unha votación ao día. Por seguridade pola pandemia, os 1.008 electores entrarán en grupos de cincuenta e orde alfabético e cambiáronse as cabinas de voto para garantir a súa ventilación.  Ademais, o Goberno aprobou un decreto para permitir aos deputados e senadores contaxiados romper o seu illamento e viaxar a Roma, pronunciándose desde o coche no aparcamento do Parlamento.

Estes tres primeiros días agárdase a maioría de votos en branco, mentres en paralelo as xuntanzas continúan, xa que ninguén quere queimar o seu candidato. Todo parece indicar que non haberá novo presidente da república Italiana ata mércores ou xoves.

 

 

Publicidade
Publicidade
Publicidade