Claudio Giráldez incorpora máis canteiráns ao traballo do primeiro equipo

Claudio Giráldez segue sumando futbolistas dos que ata o de agora dirixía no Fortuna aos adestramentos do primeiro equipo.

Nunhas datas en que lle faltan tres xogadores concentrados polas súas seleccións, á parte daqueles que se atopan recuperándose de lesións, o porriñés tira de filial para completar as sesións.

Despois da sesión de recuperación do luns e de descansar ao día seguinte, o equipo vigués  retomou este mércores o traballo e fíxoo con catro caras novas: Yoel Lago, Pablo Durán, Miguel Román e Joel López. Súmanse aos que estiveran xa a semana pasada, Javi Rodríguez, que non foi convocado para o partido do Sánchez Pizjuán, e os dous que tiveron minutos en Sevilla, Hugo Álvarez -como titular- e Damián Rodríguez -que debutou desde o banco-.

Ademais, continúan os fixos en dinámica: Hugo Sotelo, Carlos Domínguez e Coke Carrillo.