Centos de funcionarios alemáns deben abandonar Rusia a partir de xuño

Centos de funcionarios alemáns, entre eles diplomáticos e docentes, deberán abandonar Rusia a partir do vindeiro 1 de xuño, segundo confirmou o Ministerio de Exteriores xermano ao diario Süddeutsche Zeitung.

Moscova decidiu limitar drasticamente o número máximo de persoal das representacións diplomáticas e das organizacións culturais alemás no país, como represalia pola expulsión de diplomáticos rusos implicados presuntamente en labores de espionaxe.

"Este límite establecido por Moscova a partir de principios de xuño require un gran recorte en todos os ámbitos da nosa presenza en Rusia," confirmou o Ministerio de Asuntos Exteriores alemán ao devandito medio.

Segundo Süddeutsche Zeitung afecta a diplomáticos, docentes de institutos de ensino alemáns en Moscova e persoal do Instituto cultural Goethe.

Ademais da embaixada na capital, existen consulados alemáns en Yekaterinburgo, Kaliningrado, Novosibirsk e San Petersburgo.

En abril tiveron que abandonar Alemaña 30 persoas de representacións diplomáticas rusas sospeitosas, segundo os servizos secretos alemáns, de estaren implicados en labores de espionaxe.