Catro campións do mundo de J80 estarán no Mundial deste ano en Baiona

Este martes foi presentado oficialmente en Galicia o Mundial de J80 de 2023, que se celebrará do 18 ao 24 de setembro en Baiona baixo a organización do Monte Real Club de Iates. O que será o evento náutico do ano na comunidade galega reunirá nas Rías Baixas a 80 veleiros chegados dos 5 continentes, nos que durante toda unha semana navegarán e mediranse os mellores regatistas do mundo a bordo destes monotipos de 8 metros.

Catro campións do mundo de J80 xa confirmaron que estarán a competir en Baiona co obxectivo de tratar de revalidar título. Entre eles, o canario Rayco Tabares (Arrecife, 1984), que posúe no seu haber cinco mundiais (Santander, 2009; Kiel, 2015; Sotogrande, 2016; Hamble, 2017; Lles Sabres d’Olonne, 2018) dunha clase tan competitiva como é a de J80.

Precisamente esa competitividade, tanto a nivel nacional como internacional, é un dos aspectos que destacarán, en opinión de Tabares, no mundial de Baiona porque “o nivel dos J80 foi crecendo co paso dos anos e agora mesmo estase competindo con gran mestría por todo o mundo”, asegura.

Cre o canario que o de Galicia será un escenario complicado, pero afirma que “será todo un luxo navegar nun lugar tan especial e cunha cultura mariñeira tan arraigada”.