Bruxelas propón un tope ao prezo do petróleo ruso
Bruxelas propón un tope ao prezo do petróleo ruso
Tamén prohibe aos cidadáns europeos que formen parte dos consellos de administración das empresas públicas rusas e limita aínda máis os produtos que poden exportarse a Rusia
As medidas forman parte do oitavo paquete de sancións a Putin e responden á convocatoria de referendos nas zonas ocupadas
A Comisión Europea propuxo este mércores un novo paquete de sancións contra Rusia, entre elas un tope ao prezo do petróleo ruso e a prohibición aos cidadáns europeos de poder formar parte dos consellos de administración das empresas públicas rusas.
O tope ao prezo do petróleo vai na mesma liña do acordo que alcanzou o G7.
E a prohibición para que os cidadáns da UE poidan formar parte dos consellos de administración das empresas, está pensada para evitar posibles casos como o do exchanceler alemán Gerhard Schröder, que traballou para Gazprom.
"Rusia non debe beneficiarse do coñecemento europeo e dos seus expertos", sinalou a presidenta da Comisión ao anunciar as medidas.
Ursula Von der Leyen defendeu o oitavo paquete de sancións contra Rusia como resposta á mobilización parcial que o presidente ruso, Vladimir Putin, decretou a semana pasada, así como unha reacción ante a súa ameaza de empregar armas nucleares e os referendos en zonas do leste e sur de Ucraína.
"A semana pasada, Rusia levou a invasión a Ucraína a un novo nivel. Os falsos referendos organizados nos territorios que Rusia ocupou son un intento ilegal de adquirir territorio para cambiar pola forza as fronteiras internacionais", dixo a presidenta da Comisión.
Segundo Von der Leyen, estas novas sancións privarán a Rusia dun ingreso adicional de 7.000 millóns de euros.
Os países da UE deixarán de importar petróleo ruso por gasoduto a partir do 5 de decembro, pero, "certos países en vías de desenvolvemento aínda necesitan subministración de petróleo ruso a baixos prezos", sinalou a presidenta do executivo comunitario.
Esta medida "axudará a reducir, por unha banda, os ingresos de Rusia e polo outro, manterá, estable o mercado mundial da enerxía".
Ademais, a Comisión propón ampliar os produtos que estará prohibido exportar a Rusia para privala de “tecnoloxías clave”, por exemplo para a aviación, así como compoñentes electrónicos ou químicos.
Tamén se amplía a lista de persoas e entidades sancionadas por apoiar, facilitar ou beneficiarse da invasión de Ucraína, que xa contén máis de 1.300 nomes.
