Biden defende a axuda dos Estados Unidos a Israel e Ucraína
Biden defende a axuda dos Estados Unidos a Israel e Ucraína
Nun discurso no despacho oval comparou a Hamas con Putin, dos que dixo que ameazan as democracias
Defendeu a necesidade de que os EUA lideren a resposta aos conflitos, tamén por seguridade nacional
Pide a Israel que non repita os erros que cometeron en EUA tras os 11-S
"O liderado dos Estados Unidos é o que mantén o mundo unido", dixo Joe Biden no seu segundo discurso á nación dende o despacho oval. E dende esa posición defendeu a petición que fará hoxe ao Congreso para ampliar o financiamento tanto a Ucraína como a Israel, unha solicitude orzamentaria urxente de milleiros de millóns de dólares, que interpreta, tamén, como un investimento en seguridade nacional.
"Apoiar os nosos aliados críticos como Israel e Ucraína é un investimento intelixente que nos achegará dividendos en seguridade nacional por xeracións", asegurou Biden.
Serían 60.000 millóns de dólares para axuda militar a Ucraína, e 14.000 para Israel. Outros dez mil millóns para asistencia humanitaria nos dous conflitos. Amais, inclúese outra partida con 14.000 millóns para seguridade na fronteira e 7.000 para Taiwán e o Indo Pacífico.
Na alocución desta noite, duns quince minutos, comparou a Hamas con Putin. Dixo que son ameazas diferentes, que teñen en común que queren aniquilar por completo unha democracia veciña.
Sobre o conflito en Oriente Próximo, avogou pola solución de dous estados, e subliñou que Israel non debe cometer os erros que cometeu Estados Unidos despois do 11-S.
