Aviso laranxa no litoral á espera de Ingrid, que chegará con chuvia, vento e neve

O 112 Galicia informou de que a Axencia Estatal de Meteoroloxía (Aemet) dá por finalizado o aviso vermello por temporal no mar na costa da Coruña, que pasa a nivel laranxa.

O litoral de Lugo e Pontevedra segue cun nivel de alerta laranxa, polo que o estado do mar continúa sendo perigoso en todo o litoral galego.

Por iso, os servizos de emerxencias recomendan manter a máxima precaución, evitar achegarse ao mar e seguir as indicacións das autoridades mentres continúe o episodio adverso.

Ademais, o Plan especial ante o risco de inundacións en Galicia (Inungal) continúa activo en fase de preemerxencia.

En concreto, atópase en seguimento por subida dos caudais os seguintes ríos: Cambeda (Vimianzo), Lérez (Pontevedra) e Oitavén (Soutomaior).

20 centímetros de neve nas montañas de Lugo e Ourense

O boletín de avisos de MeteoGalicia ratifica unha tregua antes de que a partir do mediodía se rexistre  un novo incremento dos ventos, as choivas e a ondada na comunidade.

Tamén reflicte que se espera que o temporal recrúe este venres debido á borrasca Ingrid, con avisos laranxa por acumulacións de neve de máis de 20 centímetros ao longo do día en varias zonas da montaña de Lugo e Ourense, e de máis de 2 centímetros por encima dos 600 metros noutros puntos de Lugo, Ourense e do interior da Coruña e Pontevedra.

Tamén haberá avisos por ondada no litoral este venres, que alcanzarán o nivel vermello na Costa da Morte e outros puntos do litoral coruñés, nas Rías Baixas e na Mariña de Lugo.

Semana de avisos e temporal

O mércores, os servizos de emerxencias rexistraron 245 incidencias, a maior parte deles (112) relacionados coa caída de árbores e ramas.

Esa xornada rexistráronse refachos de vento que rozaron os 150 quilómetros por hora en Muras, na estación do Xistral; e o maior acumulado de choiva produciuse en Lousame, con 74,5 litros por metro cadrado.

Na Coruña, os bombeiros desprazáronse a última tarde noite por caída de toldos nalgún negocio hostaleiro da cidade e por outros desprendementos. 

Fin de semana con ambiente de pleno inverno e máis chuvia para a próxima semana

O portavoz de AEMET, Rubén del Campo, indicou que o sábado tamén será un día moi frío, pois as temperaturas baixarán aínda máis, con "un ambiente de pleno inverno". En concreto, rexistraranse máximas por baixo dos 10 ºC en amplas zonas do norte, centro e leste da Península, onde haberá xeadas. 

Neste día, as precipitacións volverán afectar de novo a boa parte do territorio, salvo a fachada oriental peninsular e o Val do Ebro. Con tanto frío, nevará a cotas moi baixas: duns 500 a 800 metros na metade sur e a partir de tan só uns 300 a 600 metros no norte e a zona centro. Ademais, soprará o vento con forza en zonas costeiras, este peninsular e en áreas de montaña.

Segundo o prognóstico, o domingo continuarán as precipitacións en amplas zonas do país, moitas delas aínda en forma de neve en cotas baixas. Con todo, Del Campo apuntou a que non serán tan abundantes como o día anterior. Así mesmo, as temperaturas comezarán a subir.

Para a próxima semana, o portavoz de AEMET apuntou a que é probable que continúen chegando frontes atlánticas, con precipitacións en amplas zonas do territorio que serán máis abundantes no oeste peninsular. Á súa vez, rexistraranse nevadas en zonas de montaña e, en liñas xerais, as temperaturas serán máis altas.

Reactivado o transporte de ría en Vigo tras a suspensión das últimas horas polo mal tempo

As navieiras que operan as conexións de transporte de ría en Vigo retomaron este xoves as viaxes entre a cidade e os portos de Cangas e Moaña, tras a cancelación das últimas horas debido ao mal tempo.

Así, as malas condicións meteorolóxicas obrigaron a suspender as viaxes en barco desde as 14:30 horas deste mércores, tanto na liña Vigo-Cangas como na liña Vigo-Moaña.

Este xoves, desde as 9:00 horas, quedou restablecido o servizo a Moaña, mentres que, desde as 7:00 horas están a operar os barcos que conectan Vigo con Cangas, con viaxes cada media hora.

Con todo, é posible que volva haber alteracións nas próximas horas, xa que se prevé un aumento de choivas, vento e ondada a partir do mediodía e, principalmente, este venres, cando hai aviso vermello por temporal costeiro en todo o litoral de Galicia, incluídas as Rías Baixas.

Por outra parte, a primeira hora deste xoves quedou restablecida a circulación do tren Ribadeo-Ferrol tras a caída dunha árbore. O servizo permaneceu interrompido aproximadamente unha hora, segundo informou Adif.